سندھ میں مزید ایک ہفتہ اسکول بند کرنے سے بچوں کے والدین خاصے پریشان دکھائی دیتے ہیں وہیں اب سندھ محکمہ تعلیم کی ورکنگ کمیٹی کی جانب سے کہا گیا ہے کہ تعلیمی ادارے کورونا کی صورتحال دیکھ کر ہی کھولنے یا مزید بند رکھنے سے متعلق فیصلہ بروز جمعہ کو کیا جائے گا۔
وزیر تعلیم سندھ کے ترجمان کے مطابق محکمہ تعلیم کی ورکنگ کمیٹی کورونا صورتحال دیکھ کر جو فیصل کرے گی اس کے بعد نیا اعلامیہ جاری کر دیا جائے گا۔
سندھ حکومت کے محکمہ تعلیم نے اسکولز تاحکم ثانی بند رکھنے کا اعلان کیاہے جس کا محکمہ اسکول ایجوکیشن اینڈ لٹریسی اور محکمہ کالج ایجوکیشن کی جانب سے نوٹیفکیشن جاری کیا گیا ہے۔
نوٹیفکیشن کے مطابق کورونا کے پیش نظر کراچی سمیت سندھ بھر کے نجی و سرکاری اسکول اور کالجز تاحکم ثانی بند رہیں گے، کالجز میں بورڈز کی جانب سے جاری شیڈول کے تحت امتحانات ہوں گے۔
دوسری جانب وزیراعلیٰ سندھ نے بھی ہفتے کے روز اعلان کیا تھا کہ تعلیمی ادارے مزید ایک ہفتہ بند رہیں گے۔
اس سے قبل وزیر بورڈز اور جامعات بھی ایک ہفتے تک صوبے کی جامعات بند رکھنے کا اعلان کرچکے ہیں۔
والدین سندھ حکومت سے یہی سوال کر رہے ہیں کہ آخر سندھ میں اسکولز کب کھولیں جائیں گے کیونکہ اسکولوں کی بندش سے ان کی تعلیم پر گہرا اثر پڑ رہا ہے۔