بین الاقوامی مالیاتی فنڈ نے پاکستان کے لیے اپنے ایگزیکٹو بورڈ کا اہم اجلاس کل 8 دسمبر کو طلب کرلیا ہے، جس کا باضابطہ شیڈول بھی جاری کردیا گیا ہے۔
ذرائع کے مطابق اجلاس میں پاکستان کے لیے 1.2 ارب ڈالر کی قسط کی منظوری دیے جانے کا قوی امکان ہے، جس میں سے 1 ارب ڈالر موجودہ قرض پروگرام کے تحت جبکہ 20 کروڑ ڈالر کلائمیٹ فنانسنگ کی مد میں شامل ہوں گے۔
پاکستان اور آئی ایم ایف کے درمیان 14 اکتوبر کو اسٹاف لیول معاہدہ طے پایا تھا، جس کے تحت پاکستان نے تمام مالی و انتظامی شرائط پوری کردی ہیں۔ ذرائع کا کہنا ہے کہ آئی ایم ایف کی ایک لازمی شرط یہ تھی کہ بورڈ اجلاس سے قبل کرپشن اینڈ گورننس ڈائیگناسٹک رپورٹ جاری کی جائے، جسے پاکستان نے بروقت مکمل کرکے شائع کردیا ہے۔
حکومتی حکام پرامید ہیں کہ قسط کی منظوری سے نہ صرف زرمبادلہ کے ذخائر میں بہتری آئے گی بلکہ معاشی استحکام کی کوششوں کو بھی تقویت ملے گی۔