Add Poetry

کبھی انسان کا بننا خدا اچھا نہیں ہوتا

Poet: ابنِ منیب By: ابنِ مُنیب, سویڈن

کبھی انسان کا بننا خدا اچھا نہیں ہوتا
جنابِ شیخ سے کہہ دو اُنہیں سجدہ نہیں ہوتا

بجھا دیتے ہیں وہ مکتب دلوں کی روشنی جن میں
"عصائیں" لاکھ ہوتی ہیں، یدِ بیضا نہیں ہوتا

کہا مجھ سے قلندر نے سمجھ آسان سا نکتہ
غمِ جاناں ہو جس دل میں، غمِ دنیا نہیں ہوتا

تلاطم خیز موجوں میں اترنا ہے بکھرنا ہے
جہادِ زندگی صاحب لبِ دریا نہیں ہوتا

قلم پکڑو، جگر تھامو، کہو دل کی، سنو دل کی
نہ ہو جب تک جنوں کامل، سخَن پختہ نہیں ہوتا

نہ ہے رہزن کا ڈر ہم کو نہ رہبر کی تمنا کچھ
وہاں سے ہم گزرتے ہیں جہاں رستہ نہیں ہوتا

ہمیں ہے نالہِ بلبل سبَق محفل گدازی کا
جگر خوں کر نہیں سکتا، جو دل ٹُوٹا نہیں ہوتا

فقیروں کی صدا سُن لے، مُنیبِؔ با وفا سُن لے
ہر اِک دَر پر نہیں رکھنا، کہ دل پیالہ نہیں ہوتا

Rate it:
Views: 1001
19 May, 2017
Related Tags on Urdu Ghazals Poetry
Load More Tags
More Urdu Ghazals Poetry
Popular Poetries
View More Poetries
Famous Poets
View More Poets