سَنْگِ اَسْوَد میں نمو پائے نَوائے راز کیا

سَنْگِ اَسْوَد میں نمو پائے نَوائے راز کیا
عِشْقِ صَادِق میں بَجُز دل سا ترانہ ساز کیا

دل نے پایا عشق میں وہ نالَۂِ طاقَت گُداز
مُطْرِبِ رَنْگِیں نَوا کو حاجتِ آواز کیا

ہم مُجَاوِر میرؔ کے ہیں بس فَقِیری راس ہے
ساقیا رِنْدوں کو تیرے اب حریمِ ناز کیا

حُسْنِ گَنْدُم گُوں چلا ہے ہاتھ میں ساغر لئے
مُعْجِزَہ پَیما دکھائے گا سبھی اِعْجاز کیا

خامَہ فَرْسائی کو فیصلؔ شاعری مِعْراج ہے
پَر نہ ہوں تو کیا ہوا پھر طاقتِ پرواز کیا