ایسی عظمت مرے رسولﷺ کی ہے

ایسی عظمت مرے رسولﷺ کی ہے
ساری جنت مرے رسولﷺ کی ہے

جس پہ نازاں ہے خود طہارت بھی
وہ طہارت مرے رسولﷺ کی ہے

چاند سورج بھی جانتے ہیں جنھیں
ایسی شہرت مرے رسولﷺ کی ہے

اس کی بخشش خدا بھی کر دے گا
جس پہ رحمت مرے رسولﷺ کی ہے

جوڑتی ہے خدا سے جو رشتہ
ایسی دعوت مرے رسول ﷺکی ہے

اس سے الله بھی ہو گیا راضی
جس سے قربت مرے رسولﷺ کی ہے

فکر وشمہ کو کیا ہو محشر کی
جب شفاعت مرے رسولﷺ کی ہے