حال بتائیں کیا

وہ عشق جو ھم سے روٹھ گیا
اب اُس کا حال بتائیں کیا ؟
کوئی مہر نہیں، کوئی قہر نہیں
پھر سچا شعر سنائیں کیا ؟

اِک ھجر جو ھم کو لاحق ھے
تا دیر اُسے دھرائیں کیا
وہ زھر جو دل میں اتار لیا
پھر اُس کے ناز اٹھائیں کیا ؟

اِک آگ غمِ تنہائی کی
جو سارے بدن میں پھیل گئی
جب جسم ھی سارا جلتا ھو
پھر دامنِ دل کو بچائیں کیا ؟

پھر آنکھیں لہو سے خالی ھیں
یہ شمعیں بجھنے والی ھیں
ھم خود بھی کسی سے سوالی ھیں
اس بات پہ ھم شرمائیں کیا ؟

ھم نغمہ سَرا کچھ غزلوں کے
ھم صُورت گر کچھ خوابوں کے
بے جذبۂ شوق سنائیں کیا ؟
کوئی خواب نہ ھو تو بتائیں کیا ؟