مسلہ وٹ دا

عقل عاقلاں توں لبھے بہت مشکل عقل گلی کوچے کدی رلدی نیئں
پھریں عقل خریدا پاگلا اوے عقل کسے دوکان تے تلدی نیئں
غلام حضور شاہ نوں عقل ناں کتوں لبھی خواہش عقل دی مینوں بھلدی نیئں
ایس مسلے دا پتا نہ مینوں لگے مسلہ ایہہ کوئی مینوں سمجھاندا نئیں
ملاں پڑھ قرآن حدیث تھکے مسلہ اصل تے کوئی سمجھاندا نئیں
معنی عربی دے لفظ دا وٹ ہووے ملاں کوئی وی کولوں بناوندا نئیں
وٹ کئی جہان تے ہون یارو اصلی وٹ تے کوئی سمجھاندا نئیں
گھر آوے مہمان تے پیا ویکھیں سیویاں وٹ کے گھریں رکھاندا نئیں
لو دیوے دی ہوئی اے مدھم یارو بتی وٹ کے دیوے وچہ پاوندا نئیں
منجے ٹٹ کے ہوئے نیں کھوہ سارے وان وٹ کے اونہاں اناوندا نئیں
وہلی بیٹھی دل نہ لگے میرا ماہل وٹ کے چرخے نوں پاوندا نئیں
پانی نت کیارے دا ٹٹ جاوے وٹ کیارے دی توں پکی بناوندا نئیں
لگے گرمی دا وٹ وی بہت مینوں پکھا اٹھ کے کیوں چلاوندا نئیں
کیڑے وٹ توں آویں نہ گھر ساڈے وٹ دلدا یار گنواوندا نئیں
منڈا باز نہ آوے خرمستیاں توں مکا وٹ کے اس نوں لاوندا نہیں
گلاں نور سمند دیاں سن کیتے وٹ متھے تے اوہ پاوندا نئیں
کھلی پھر دی اے کٹی تیری نت یارا رسا وٹ کے اوہنوں پاوندا نئیں
وٹ دسے نیں بارہ میں کل یارا ہور وٹ میں کوئی سناؤندا نئیں
غلام حضور شاہ نوں وٹ نہ کوئی دسے کیڑے وٹ تے عمل کاؤندا نئیں
آکھے لگے نہ تیری اولاد یارا گھوری وٹ کے اونہاں نوں ڈراندا نئیں
تیرھیویں وٹ دا میں کیتا ذکر پچھوں آکھے حضور شاہ دے عمل کماؤند نئیں
لکے وٹ نیں ٹیڈھ اندر پئی ماراں واجاں نور سمند گھریں آؤندا نئیں
پیسے وٹ کے گھوڑے دے کول رکھاں رقم انیویں تے یار گواندا نئیں
پیا بسترے دے وچہ وٹ یارا میرا وٹ توں یار کڈاندا نئیں
راکھا مکئی دا بنے تے جا بیٹھوں گلیلے وٹ کے کیوں چلاندا نئیں
اگلا مصرع مٹیا ہویا اے
پوچھل وٹ کے ماری اے مج تینوں اوہنوں اٹھ کےتو نواندا نئیں
دھاگے کچے نال کپڑے پیا روز سیویں دھاگہ وٹ کے سوئی وچہ پاونداا نئیں
کوٹرا وٹ کے کھیڈن پئے روز منڈے پچھے ۔۔۔۔۔۔۔۔لاوندا ا نئیں
غلام حضور شاہ نہ دس توں وٹ سارے وٹ دسنوں توں شرماندا ا نئیں
پیند وٹنے نوں تینوں سدیا سی پھڑ کے وٹنا وٹ چڑھاندا نئیں
پونیاں وٹ کے رکھاں گھر اپنے چرخا خرید کے توں لیاوندا نئیں
کھبڑ وٹ کے نیں گھر رکھے حقہ اٹھ کے یار بناوندا نئیں
وٹ انگریزی دا معنا کیا ہووے ہور معنا کوئی بناؤندا نئیں
معنی عربی دے لفظ دا وٹ ہووے ملاں صحیح کوئی وٹ بتاوندا نئیں
چوی وٹ حضور شاہ دس دتے جان وٹاں توں یار توں چھڑاوندا نئی