کیسے بیاں کروں تھا وہ کیا کیا رسول کا

کیسے بیاں کروں تھا وہ کیا کیا رسول کا
کہنے کو آپ کہہ لیں نواسا رسول کا

تعریف اُس کی کیا ہو، ولادت کے بعد ہی
جس نے لعاب دہن تھا پایا رسول کا

سید تھا سبط بھی تھا وہ اکبر شہید بھی
القاب میں حسین تھا یکتا رسول کا

آ کر کہا سعید ہے یہ، جبرائیل نے
اللہ کی طرف سے بھی ناتا رسول کا

تُم بھولتے ہو کیوں جو تھا فطرس کا واقعہ
لمس حسین اور دلاسہ رسول کا

جس نے ہے دیکھنا مجھے، دیکھے حسین کو
تھا کس قدر مشابہ وہ بانکا رسول کا

اظہر میں کربلا کو کروں یاد کس طرح
جو بہہ گیا وہاں پہ وہ خوں تھا رسول کا