کراچی: افریقی ملک نا ئیجیریا میں ایک پاکستانی سمیت 60 سے زائد افراد کو اغواء کرلیاگیا، اغواء کنندگان نے مطالبات کی منظوری کیلئے 6 دن کا وقت دیدیا ۔
اپنے آڈیو پیغام میں ابوذر نے بتایاکہ ہمیں 28 مارچ کو اغوا کیا گیا۔ میں جے میرینز نامی کمپنی میں کام کرتا ہوں۔ مجھ سمیت 62 لوگوں کو اغواء کیا گیا ہے۔ حکومت پاکستان، حکومت نائیجیریا اور عالمی برادری ہماری رہائی کے لیے فوری کوششیں کریں ۔
ابوذرکی والدہ نے وزیراعظم شہباز شریف اور وزیر خارجہ بلاول بھٹو زرداری سے اپیل کی ہے کہ حکومت پاکستان فوری کارروائی کرے اورمیرے بچے کو رہائی دلوائیں۔
ملتان کے رہائشی ابوذر کے والد شیخ محمد افضل کا کہنا ہے کہ میرے بیٹے نے فیصل آباد سے مائیکرو بیالوجی میں پی ایچ ڈی کی ہے اور وہ نائیجیریا میں ایک غیر ملکی کمپنی میں جنرل منیجر کے طور پر کام کر رہا تھا۔
شیخ محمد افضل نے مزید کہا کہ ان کے بیٹے کو 28 مارچ کو دیگر افراد کے ساتھ اغواء کیا گیا تھا اور اغوا کاروں نے بدلے میں نائیجیریا کی حکومت سے اپنے مغویوں کی رہائی کا مطالبہ کیا ہے۔
مغوی کے والد کا کہنا ہے کہ ایک ماہ قبل اپنے بیٹے کی رہائی کے لیے وفاقی حکومت سے مدد کی درخواست کی تھی تاہم کسی نے اب تک کوئی رابطہ نہیں کیا اور نہ ہی ان کے بیٹے کی رہائی کے حوالے سے کوئی تفصیلات ان کے ساتھ شیئر کی گئی ہیں۔