گورنمنٹ اسکولوں کے دس ٹاپ طلباء و طالبات کے اعزاز میں تقریب

تقریب کی صدارت چیئرمین میٹرک بورڈ پروفیسر ڈاکٹر سعید الدین کر رہے تھے۔ دیگر مہمانوں میں ڈسٹرکٹ ایجوکیشن آفیسر مرزا ارشد بیگ، ماہر تعلیم سلطان مسعود شیخ، انیس الرحمن، عبدالرحمن، اساتذہ کرام، والدین اور دیگر نے بڑی تعداد میں شرکت کی۔سالانہ امتحانات میں جن طلباء و طالبات نے پوزیشنیں حاصل کیں ان میں طلباء میں پہلی پوزیشن ارسلان بھٹو، حبیب علوی، امیر حمزہ، دوسری پوزیشن عمیر لیاقت، اویس احمد، تیسری پوزیشن علی اسامہ، چوتھی پوزیشن محمد عبدالرافع خان، پانچویں پوزیشن فہد، چھٹی پوزیشن لاریب حسن اور ساتویں پوزیشن وجاہت علی خان نے حاصل کی۔ اسی طرح طالبات میں پہلی پوزیشن سیدہ مناہل غضنفر، دوسری پوزیشن حفظہ، تیسری پوزیشن نبیہ عامر، چوتھی پوزیشن علینہ ناز، پانچویں پوزیشن نمرہ کنول، چھٹی پوزیشن بشریٰ معطر، ساتویں پوزیشن انسا بی بی، آٹھویں پوزیشن سیدہ ہیرا بتول، نویں پوزیشن نوبائرہ احمدجبکہ دسویں پوزیشن ماہ نور نے حاصل کی۔تقریب سے خطاب کرتے ہوئے پروفیسر ڈاکٹر سعید الدین نے کہا کہ طلباء و طالبات کی جدید خطوط پر کردار سازی اور انہیں جدید علوم سے آراستہ کرنا وقت کی اہم ضرورت ہے کیونکہ یہ طلباء مستقبل کے معمار وطن ہیں انہوں نے کہا کہ گورنمنٹ اسکولوں کے پوزیشن ہولڈر طلباء و طالبات کی ہم نے پذیرائی بھرپور طریقے سے کی ہے اور آئندہ بھی ہم ان طلباء کی تعلیمی نصاب کے حوالے سے بھرپور تعاون کریں گے انہوں نے کہا کہ طلباء درس و تدریس کیساتھ ساتھ اخلاقی تربیت پر بھی خاص توجہ دیں۔ ڈسٹرکٹ ایجوکیشن آفیسر مرزا ارشد بیگ نے کہا کہ گورنمنٹ اسکولوں کے طلبہ کی پذیرئی کر کے چیئرمین میٹرک بورڈ نے تاریخ رقم کر دی ہے انہوں نے کہا کہ ہم بھی گورنمنٹ اسکولوں کے طلباء کی پڑھائی پر توجہ دے رہے ہیں اور اساتذہ کی تربیت کیلئے پروگرام بھی مرتب کر رہے ہیں۔ سلطان مسعود شیخ نے کہا کہ ہمیں خوشی ہے کہ اس تقریب کے انعقاد سے گورنمنٹ اسکولوں کے طلباء میں مزید محنت کا جذبہ پیدا ہو گا۔ انیس الرحمن نے کہا کہ میٹرک بورڈ ہر سطح پر گورنمنٹ کے طلباء و طالبات کی صلاحیتوں کو ابھارنے کا پلیٹ فارم فراہم کرتا رہا ہے۔ عبدالرحمن نے کہا کہ تعلیم فلسفہ غور و فکر اور عمل کا نام ہے ہمیں ان طلباء و طالبات کو تعلیم کے میدان میں مکمل آزادی دینی چاہئے۔ اس موقع پر ناظم امتحانات خالد احسان، ڈائریکٹر ایجوکیشنل ریسرچ حور مظہر، سید منیر حسن اور ایم اے جعفری بھی موجود تھے۔