سیکیورٹی خدشات کی وجہ سے وفاقی دار الحکومت کے تعلیمی اداروں میں 31دسمبر تک دی گئی تعطیلات میں 12جنوری تک توسیع کئے جانے کا امکان ہے، اس حوالے سے وزارت کیڈجلد باضابطہ فیصلہ کرے گی۔ تفصیلات کے مطابق پشاور میں آرمی پبلک سکول پر دہشت گردوں کے حملے کے بعد پیدا ہونے والی صورتحال کے پیش نظر اسلام آباد کے سرکاری و نجی تعلیمی اداروں میں سکیورٹی کو فول پروف بنانے کےلئے اقدامات پر عملدرآمد شروع کر دیا گیا ہے، وزارت کیڈ کے وزیر مملکت بیرسٹر عثمان ابراہیم نے گزشتہ دنوں اسلام آباد انتظامیہ سے ایک ملاقات کی تھی جس میں اسلام آباد کے تعلیمی اداروں میں سیکیورٹی بہتر بنانے کےلئے اہم فیصلے کئے گئے تھے جن پر مرحلہ وار عمل شروع کر دیا گیا ہے، اسی اجلاس میں اسلام آباد کے تعلیمی اداروں میں 5 جنوری تک تعطیلات کا فیصلہ کیا گیا تھا تاہم فیڈرل ڈائریکٹوریٹ آف ایجوکیشن کے ڈی جی عامر اشرف خواجہ نے جو نوٹیفکیشن جاری کیا اس میں 5جنوری کے بجائے 31 دسمبر کی تاریخ لکھ دی، جس پر وزارت کے سینئر حکام نے سخت برہمی کا اظہار کیا ہے۔ ذرائع کے مطابق وزیر مملکت نے مزید چھٹیوں کے معاملے پر مشاورت کےلئے اجلاس طلب کرلیا گیا ہے، جس میں تمام صورتحال کا جائزہ لے کر چھٹیوں میں توسیع کا حتمی فیصلہ کیا جائے گا۔