اعلیٰ ثانوی تعلیمی بورڈ کراچی کے چیئرمین پروفیسر انوار احمد زئی نے کہا ہے کہ درس گاہیں ہمارے نظریاتی قلعے ہیں، ان کی حفاظت کرنا اساتذہ کی ذمہ داری ہے۔ انہوں نے یہ بات بین الاقوامی یونیورسٹی اسلام آباد، ریجنل دعوۃ اکیڈمی اور الکریم سیکنڈری اسکول کے اشتراک سے ہونے والے چار روزہ اسلامی تربیتی پروگرام برائے اساتذہ کی اختتامی تقریب سے خطاب کرتے ہوئے کہی۔ پروفیسر انوار احمد زئی نے کہا کہ تعلیم کی بنیاد نظریہ حیات پر ہے اور اس کی بنیاد عین فطرت اور اسلامی فلسفہ پر ہے، اسلامی تعلیمی نظام میں تربیت کی بہت زیادہ اہمیت ہے، اسلامی تعلیمات میں حاکم اور محکوم کا کوئی تصور نہیں ہے، اساتذہ کی ذمہ داری ہے کہ وہ طلبہ کی کردار سازی اور تربیت سازی میں بنیادی کردار ادا کریں۔ انہوں نے بتایا کہ لارڈ میکالے کی رپورٹ کے مطابق برصغیر کے لوگ ناخواندہ ضرور تھے مگر جاہل نہیں تھے۔ تقریب کے اختتام پر مہمانوں میں انعامات اور اسناد تقسیم کیے گئے۔