متحدہ عرب امارات کے قونصل جنرل بخیت عتیق الرومیتی نے پاکستانیوں کے لیے ویزوں کی بندش کی افواہوں کی سختی سے تردید کرتے ہوئے کہا ہے کہ پاکستان اور یو اے ای کے تعلقات مستحکم بنیادوں پر قائم ہیں اور ویزوں کے اجرا میں کوئی تعطل نہیں ہے۔
نجی ٹی وی سے گفتگو میں قونصل جنرل نے کہا کہ بعض عناصر سازش کر کے ویزوں کی بندش کے حوالے سے افواہیں پھیلا رہے ہیں تاکہ عوام میں خوف و ہراس پیدا کیا جا سکے تاہم حقیقت یہ ہے کہ پاکستانی شہری بلاتعطل ویزے حاصل کر سکتے ہیں۔
انہوں نے مزید کہا کہ کراچی میں قائم ایشیا کے سب سے بڑے ویزا سینٹر میں عملہ پاکستانی بہن بھائیوں کی خدمات کے لیے ہر وقت موجود ہے اور کچھ نوعیت کے ویزوں کے لیے پیشگی تاریخ کی ضرورت ہے۔ قونصل جنرل نے یقین دہانی کرائی کہ علاج و معالجے، تعلیمی سیمنیار اور دیگر متعلقہ خدمات کے لیے تعاون جاری رہے گا۔
بخیت عتیق الرومیتی نے زور دیا کہ پاکستان اور یو اے ای کے تعلقات مضبوط ہیں اور کسی بھی افواہ یا سازش کو اس تعلقات کی مضبوطی متاثر نہیں کر سکتی۔