ساؤتھ افریقا کے سابق کپتان اور مایہ ناز بیٹسمین فاف ڈو پلیسی نے اعلان کیا ہے کہ وہ اگلے سال پاکستان سپر لیگ میں کھیلیں گے اور اس کے ساتھ ہی انہوں نے انڈین پریمیر لیگ کو خیر آباد کہہ دیا ہے۔
فاف ڈو پلیسی نے اپنے انسٹاگرام اکاؤنٹ پر شائقین کو بتایا کہ پی ایس ایل میں کھیلنا ان کے لیے ایک نیا چیلنج ہے اور وہ شائقین کو مایوس نہیں کریں گے۔ انہوں نے کہا کہ وہ آئی پی ایل کے بجائے پاکستان کی لیگ میں حصہ لینے کا فیصلہ کر کے نئے تجربات اور چیلنجز کا حصہ بننا چاہتے ہیں۔
ڈو پلیسی گزشتہ 14 سال سے مختلف آئی پی ایل ٹیموں کے لیے کھیلتے رہے ہیں۔ گزشتہ سیزن میں دہلی کیپیٹلز نے انہیں ٹیم میں شامل کیا تھا، لیکن 2026 کے سیزن کے لیے انہیں ریٹین نہیں کیا گیا اور کھلاڑیوں کے انتخاب کے لیے چھوڑ دیا گیا۔
فاف ڈو پلیسی پی ایس ایل 11 کے لیے پہلا بڑا بین الاقوامی نام ہیں جنہوں نے لیگ کے لیے سائن کیا ہے۔ اب دیکھنا یہ ہے کہ کون سی فرنچائز انہیں اپنی ٹیم میں شامل کرتی ہے اور پاکستانی شائقین انہیں ایکشن میں دیکھ سکیں گے۔