سندھ کے سینئر وزیر اور صوبائی وزیر برائے اطلاعات، ٹرانسپورٹ و ماس ٹرانزٹ شرجیل انعام میمن نے کہا ہے کہ چیئرمین بلاول بھٹو زرداری عوام کی حمایت اور مینڈیٹ کے ذریعے ہی اقتدار میں آئیں گے اور کسی غیر قانونی طریقے سے اقتدار میں نہیں آئیں گے۔ انہوں نے عظمیٰ بخاری پر بھی تنقید کرتے ہوئے کہا کہ جس طریقے سے وہ اقتدار میں آئی ہیں وہ صرف انہیں قبول ہے۔
کراچی میں پریس کانفرنس کرتے ہوئے شرجیل انعام میمن نے مزید کہا گیا کہ گورنر کی تبدیلی وفاقی حکومت کے اختیار میں ہے اور یہ کہنا مشکل ہے کہ کس کی شیروانی تیار ہو رہی ہے۔
بانی پاکستان تحریکِ انصاف کے حوالے سے شرجیل میمن نے کہا کہ وہ جیل میں تمام سہولیات کے ساتھ موجود ہیں اور ان پر کوئی تشدد نہیں ہو رہا، تاہم وہ جیل سے ملک کے خلاف سازشیں کر رہے ہیں اور بیرونِ ملک دشمن قوتوں سے مدد حاصل کر رہے ہیں۔ انہوں نے کہا کہ پاکستان نے بہت سے ہیروز کھو دیے، جن میں قائد عوام ذوالفقار علی بھٹو بھی شامل تھے، جو قوم کے قیمتی اثاثے تھے۔ انہوں نے پی ٹی آئی کے کارکنوں کو مشورہ دیا کہ عدالتوں میں قانونی جنگ لڑیں اور ملک و اداروں کو متنازع نہ بنائیں۔
کراچی کی صورتحال کے حوالے سے سوال کے جواب میں شرجیل میمن نے کہا کہ ایک وقت تھا جب کراچی دبئی سے آگے تھا اور پاکستان بننے سے پہلے یہاں ٹرام چلتی تھی، لیکن بعد میں یہاں ہیروئن کلچر، بھتہ خوری اور بوری بند لاشوں کا دور آیا۔ آج کراچی میں کچرا اٹھایا جا رہا ہے اور پانی کے منصوبوں پر کام جاری ہے اور شہری سہولیات بہتر بنانے کی کوششیں کی جا رہی ہیں۔
سندھ کے سینئر وزیر اور صوبائی وزیر برائے اطلاعات، ٹرانسپورٹ و ماس ٹرانزٹ شرجیل انعام میمن نے کہا ہے کہ پاکستان پیپلز پارٹی کل اپنی بنیاد ڈالے ہوئے 58 سال مکمل کر رہی ہے۔ اس موقع پر ملک بھر میں پیپلز پارٹی کی جانب سے مختلف تقاریب اور پروگرام منعقد کیے جا رہے ہیں، جن میں پارٹی کے کارکنان کیک کاٹیں گے اور مرکزی تقریب میں چیئرمین بلاول بھٹو زرداری خطاب کریں گے۔
شرجیل میمن نے کہا کہ ملک بھر کے مختلف مقامات پر ڈجیٹل اسکرینیں لگائی جائیں گی تاکہ عوام براہِ راست بلاول بھٹو زرداری کا خطاب دیکھ سکیں اور پارٹی کی 58 سالہ جدوجہد اور خدمات سے آگاہ ہوں۔ انہوں نے بتایا کہ پیپلز پارٹی نے پاکستان کے لیے جو قربانیاں دی ہیں، ان کی مثال دنیا میں نہیں ملتی، اور ملک کی ایٹمی طاقت، پہلا متفقہ آئین، قومی شناختی کارڈ کا اجرا، اور تعلیمی اداروں کے قیام جیسے کارنامے پیپلز پارٹی کے بانی قائد عوام ذوالفقار علی بھٹو کے دور میں ممکن ہوئے۔
شرجیل میمن نے کہا کہ شہید بینظیر بھٹو نے پاکستان کو میزائل ٹیکنالوجی دی اور خواتین کی مضبوط آواز بنیں جبکہ صدر آصف علی زرداری اور چیئرمین بلاول بھٹو زرداری نے بھی ملک کے لیے نمایاں خدمات سرانجام دی ہیں۔ انہوں نے بلاول بھٹو کی بھارت میں کشمیر کے حق میں جراتمندانہ موقف کو سراہا۔