تین ملکی ٹی ٹوئنٹی ٹورنامنٹ کے فائنل سے قبل سری لنکا کے کپتان داسن شناکا نے پاکستان میں اپنی ٹیم کو فراہم کی گئی بہترین سیکیورٹی اور اعلیٰ درجے کی میزبانی پر حکومتِ پاکستان اور پاکستان کرکٹ بورڈ کا شکریہ ادا کیا ہے۔
ٹاس کے موقع پر گفتگو کرتے ہوئے داسن شناکا نے کہا کہ پاکستان میں ان کے کھلاڑی خود کو مکمل طور پر محفوظ محسوس کرتے ہیں اور سیکیورٹی کے حوالے سے کسی قسم کی تشویش کا سامنا نہیں کرنا پڑا۔انہوں نے کہا کہ پورا دورہ بہترین ماحول میں گزرا ہے اور ہر کھلاڑی کا بھرپور خیال رکھا گیا۔
سری لنکن کپتان نے مزید بتایا کہ پاکستان ہمیشہ ان کی ٹیم کی میزبانی بھرپور محبت کے ساتھ کرتا ہے اور کھلاڑیوں کو کبھی کسی شکایت کا موقع نہیں ملا۔ان کا کہنا تھا کہ پاکستان میں بہترین سہولیات ملتی ہیں، اسی وجہ سے ہمارا پورا دھیان کرکٹ پر رہتا ہے۔