انسدادِ دہشت گردی کی عدالت راولپنڈی میں بانی پاکستان تحریکِ انصاف سے متعلق دو علیحدہ درخواستوں پر سماعت وکیلِ صفائی کی عدم حاضری کے باعث ملتوی کر دی گئی۔
عدالت میں اڈیالہ جیل میں ملاقات کی اجازت اور اکاؤنٹس ڈی فریز کرنے سے متعلق درخواستوں پر سماعت ہونا تھی، تاہم بانی پی ٹی آئی کے وکیل پیش نہ ہوئے، جس کے باعث کارروائی آگے نہیں بڑھ سکی۔ جج اور پراسیکیوشن ٹیم طویل وقت تک وکیل کا انتظار کرتی رہی۔
پراسیکیوشن کے نمائندے ظہیر شاہ نے مؤقف اپنایا کہ سوشل میڈیا پر عدالتوں کے بارے میں غلط تاثر دیا جاتا ہے کہ کیس نہیں سنے جاتے، جبکہ آج عدالت فریقین کے انتظار میں بیٹھی رہی مگر دفاعی وکیل پیش ہی نہیں ہوئے۔
عدالت نے دونوں درخواستیں یکم دسمبر تک ملتوی کرتے ہوئے ہدایت کی کہ اگلی سماعت پر مؤثر کارروائی کی جائے گی۔