وکلا کا پولیس افسر پر سرعام تشدد اور عدلیہ کے آزاد ہونے کا واضح ثبوت۔۔۔۔!

دیکھا جا رہا ہے کہ جب سے عدلیہ بحال ہوئی ہے تب سے وکیل حضرات آئے دن کوئی نہ کوئی نیا کارنامہ سرانجام دے رہے ہیں کبھی فیصل آباد میں بجلی کے محکمے سے ان کی ڈنڈہ برداری چل رہی ہے تو کبھی اپنے ہی وکیل بھائیوں کے ساتھ کسی بھی بار کونسل میں ہاتھا پائی میں مصروف دکھائی دیتے ہیں- آئے دن وکلاﺀ کے یہ کارنامےعدلیہ کی بدنامی کا باعث بن رہے ہیں- جس طرح وکلاﺀ عدلیہ کی بحالی کی مہم میں منظم دکھائی دیتے تھے ٹھیک اسی طرح وہ ان واقعات میں بھی منظم دکھائی دیتے ہیں- حال ہی میں وکلاﺀ نے لاہور میں ضلع کچہری کے احاطے میں ایک پولیس والے کو سرعام تشدد کا نشانہ بنا کر عدلیہ کے آزاد ہونے کا واضح ثبوت عوام کو فراہم کیا ہے-

تفصیلات کے مطابق لاہور میں ضلع کچہری کے احاطے میں وکلا نے سرعام وردی میں موجود پولیس کے اسسٹنٹ سب انسپکٹر پر مکوں اور تھپڑوں کی بارش کردی۔ واقعہ اس وقت پیش آیا جب عدالت میں پیشی کے بعد رانا احمد سعید، فضل میر جہانگیر اور ملک حنیف ایڈووکیٹ سمیت پانچ وکلا نے تھانہ نشتر کالونی کے اے ایس آئی فقیر محمد پر زور دیا کہ وہ ملزم پارٹی کو بے گناہ ثابت کرنے کے لیے ان کی مدد کرے۔ اے ایس آئی کے انکار پر وکلا نے اسے تشد کا نشانہ بنایا۔ اے ایس آئی فقیر محمد نے پانچوں وکلا کے خلاف کار سرکار میں مداخلت، تشدد، جان سے مارنے کی دھمکیاں دینے اور پولیس کی وردی پھاڑنے کے الزام میں تھانہ اسلام پورہ میں ایف آئی آر درج کرانے کیلئے درخواست جمع کرادی ہے

اب آپ اپنی رائے دیجیے کیا وکلاﺀ کے یہ اقدام درست ہیں؟ کیا آپ ایسی آزاد عدلیہ کے خواہاں ہیں؟ کیا وکلاﺀ کی اس دیدہ دلیری سے کوئی نیا بحران جنم لے گا؟ کہیں اس سے بہتر یہ تو نہیں تھا کہ عدلیہ معزول ہی رہتی؟ اب چیف جسٹس افتخار محمد چوہدری صاحب ان واقعات کا ازخود نوٹس کیوں نہیں لیتے؟