چینی صرف کھانے کی چیز نہیں٬ مزید حیرت انگیز کمالات

چینی کچن میں ہر وقت موجود رہنے والی چیزوں میں سے ایک ہے کیونکہ میٹھا کھانا کسے پسند نہیں ہوتا جبکہ چائے بھی اس کے بغیر اکثر افراد کو بے مزہ لگتی ہے۔ مگر کیا آپ کو معلوم ہے کہ چینی میٹھا کھانے کی تسکین سے ہٹ کر بھی بہت کچھ ایسا کرسکتی ہے جس کا آپ نے تصور بھی نہیں کیا ہوگا۔ ڈان کی رپورٹ کے مطابق داغ دھبوں سے نجات دلانے سے لے کر بیوٹی ٹریٹمنٹ تک، چینی کو مختلف مسائل سے نجات دلانے کے لیے بھی استعمال کیا جاسکتا ہے اور ہزاروں روپے کا خرچہ بچایا جاسکتا ہے۔
 

زخموں کو مندمل کرنا
مختلف تحقیقی رپورٹس کے مطابق چینی کو زخموں پر دھونے اور ڈریسنگ سے پہلے چھڑکنا بیکٹریا کو مارنے میں مدد دیتا ہے، جو زخموں کو جلد ٹھیک نہیں ہونے دیتے۔ بیکٹریا کو نشوونما کے لیے نمی کی ضرورت ہوتی ہے جبکہ چینی زخم میں سے پانی کو کھینچ لیتی ہے۔

زبان کی جلن سے نجات
گرم چائے یا کھانے نے زبان کو جلا دیا ہے، اگر ایسا تجربہ ہو تو چٹکی بھر چینی کو چوس لیں، اس سے فوری ریلیف میں مدد ملے گی۔

شہد کی مکھیوں اور کیڑوں کے ڈنک کے خلاف موثر
شہد کی مکھیوں کے ڈنگ یا کیڑوں کا کاٹنا کافی تکلیف دہ ہوتا ہے، اس سے نجات کے لیے چینی اور پانی کی یکساں مقدار کو مکس کریں اور متاثرہ جگہ پر بیس منٹ تک لگا رہنے دیں۔