ناقابلِ یقین حقائق٬ زرافہ کی زبان سے آئن اسٹائن کے دماغ تک

ہم سب دنیا کے مختلف شعبوں سے متعلق معلومات اور حقائق جاننے کا شوق رکھتے ہیں- اور اکثر ہمارے علم میں آنے والے حقائق یا تو دلچسپ ہوتے ہیں یا پھر ہمارا دنیا کو دیکھنے کا نظریہ ہی بدل دیتے ہیں- ہماری یہ دنیا دلچسپ اور انوکھی معلومات سے بھرپور ہے اور ہم اکثر سے واقف بھی ہوتے ہیں لیکن پھر بھی متعدد حقائق ایسے ہیں جو اب بھی ہمارے علم میں نہیں- ایسے ہی دنیا سے متعلق چند ناقابلِ یقین حقائق کے بارے آج آپ ہمارے اس آرٹیکل میں بھی جانیں گے جو یقیناً آپ کے علم میں اضافہ کریں گے-

زرافہ٬ زبان سے کان کی صفائی
زرافے گردن کی مانند زبان بھی لمبی رکھتے ہیں- ان کی زبان کی لمبائی 20 انچ تک ہوتی ہے- یہ اپنی زبان کی مدد سے نہ صرف بلند درختوں سے غذا حاصل کرسکتے ہیں بلکہ اسے اپنے کان کی صفائی کے لیے بھی استعمال کرسکتے ہیں-

تخلیقی صلاحیتوں کے حامل افراد کے خواب
193 کالجوں کے طلبا پر کی جانے والی ایک تحقیق میں اس بات کا انکشاف ہوا ہے کہ تخلیقی صلاحیتوں کے حامل افراد کو دکھائی دینے والے واضح خواب انہیں جاگنے کے بعد بھی یاد رہتے ہیں-

گرینیڈ کا زیرِ آب دھماکہ
آپ کو یہ جان کر حیرت ہوگی کہ زیرِسمندر پھٹنے والا گرینیڈ زمین کے مقابلے میں آپ کو زیادہ نقصان پہنچا سکتا ہے- اگر انسان کا سامنا زیرِ آب گرینیڈ بم سے ہوجائے تو یہ پھٹنے کی صورت میں یہ انتہائی دباؤ کے ساتھ جھٹکا پیدا کرتا ہے جس سے انسان کے نہ صرف پھیپھڑے چور ہوجاتے ہیں بلکہ دماغ بھی مفلوج ہوجاتا ہے اور اس کی موت واقع ہوسکتی ہے-

والد کی لاش کو 13 سال فریزر میں رکھنے والا جاپانی
ایک جاپانی نوجوان نے اپنے والد کی لاش کو 13 سال تک فریزر میں اس یقین کے ساتھ چھپائے رکھا کہ ایک روز ضرور اس کے اندر زندگی واپس لوٹ آئے گی- تاہم پڑوسیوں کی شکایت پر پولیس نے اس لاش کو برآمد کرلیا لیکن نوجوان پر کسی قسم پر کوئی مقدمہ قائم نہیں ہوا کیونکہ اس نے کوئی قانون نہیں توڑا تھا-

ایفل ٹاور کی بلندی میں تبدیلی
ہر موسم گرما میں thermal expansion کی وجہ سے ایفل ٹاور کی بلندی میں 6.75 انچ کا اضافہ ہوجاتا ہے- اور جیسے ہی درجہ حرارت میں کمی واقع ہوتی ہے اور سورج نیچے جاتا ہے تو ایفل ٹاور کی بلندی بھی واپس کم ہوجاتی ہے-

مارک زکربرگ اور وِن ڈیزل دوست
فیس بک کے بانی مارک زکربرگ اور بالی ووڈ کے مشہور اداکار ون ڈیزل کی ملاقات فیس بک پر ہوئی جس کے بعد یہ دونوں ایک دوسرے کے اچھے دوست بن گئے- زکر برگ وِن ڈیزل کے بہت بڑے پرستار ہیں اور ہمیشہ ان کے کام کی حوصلہ افزائی کرتے ہیں-