پانی پر تیرتے ہوئے افریقی گاؤں

یہ گاؤں سولہویں اور سترھویں صدی کے دوران ’’ٹوفینو قبیلے‘‘ نے جھیل کے وسط میں فان جنگجوؤں کے حملوں سے محفوظ رہنے کے لیے تعمیر کیا تھا۔ مذکورہ لڑاکا قبیلے کے افراد ، ٹوفینو قبائلیوں پر حملے کر کے انہیں قیدی بنا کر لے جاتے تھے اور انہیں غلاموں کی حیثیت سے یورپی تاجروں کے ہاتھوں فروخت کردیتے تھے۔ فان قبیلے کے عقیدے کے مطابق ان کے دیوتاؤں کی جانب سے بعض مذہبی پابندیوں کی وجہ سے جھیل کے پانی میں اترنے کی اجازت نہیں تھی جس سے فائدہ اٹھا کر ٹوفینو قبائلیوں نے جھیل کے وسط میں چوبی مکانات پر مشتمل گاؤں بسا کرخود کو ان کے حملوں سے محفوظ کرلیا۔ افریقہ کے ٹوفینو باشندے غیر مہذب اور وحشی ماحول میں رہنے کے باوجود بے انتہا ذہین تھے، قبیلے کے لوگوں نے سطح آب پر جس طرح سے میلوں رقبے پر محیط علاقے کو آباد کیا، اس پر آج کے سائنسی اور سول انجینئرنگ کے ماہرین بھی حیران ہیں۔

انہوں نے جھیل کے گہرے پانی میں لکڑی کے بڑے بڑے مضبوط شہتیروں اور تختوں کے پلیٹ فارم بنا کر ان پر بانس کے ڈنڈوں کی مدد سے جھونپڑی نما مکانات تعمیر کیے ، جن پر کھپریل ، گھاس پھوس اور چٹائیوں سے چھتیں ڈالی گئی ہیں، ان کے ساتھ جھیل میں اگی گھاس اورخودرو پودے اگے ہوئے ہیں جن سے اس گاؤں کے اطراف کا منظر انتہائی دلکش معلوم ہوتا ہے۔ قبیلے کے لوگوں نے تو اپنی یہ آبی بستی ،’’نظریہ ضرورت ‘‘کے تحت فان قبیلے کے خوں خوار لوگوں سے ا پنی زندگیاں محفوظ کرنے کے لیے بسائی تھی، لیکن آج یہ فن تعمیر کا ایسا نادر شاہکار بن چکی ہے کہ لوگ دور دراز کے علاقوں سے اسے دیکھنے کے لیے آتے ہیں۔ اس آبی گاؤں میں بیس ہزار سے زائد نفوس آباد ہیں جو افریقہ کے دیگر علاقوں کے باشندوں کی بہ نسبت انتہائی خوش حال زندگی گزار رہے ہیں۔
 

کوٹونو شہر سے ایک گھنٹے کی مسافت پر میلوں رقبے پر پھیلے اس گاؤں کو پہلی نظر میں دیکھنے کے بعد یہ محسوس ہوتا ہے جیسے کہ ہم کسی ایسے علاقے کے پاس سے گزر رہے ہیں جس کے گھر سیلاب کی وجہ سے زیر آب آگئے ہیں اور اس کے مکین بیرونی دنیا سے کٹ چکے ہیں۔ لیکن جب اس گاؤں کے اندر داخل ہوتے ہیں تو معلوم ہوتا ہے کہ یہ جھیل پر تیرتا ہوا ایسا چوبی گاؤں ہے جو انسانی ہاتھوں کی کاری گری سے خوب صورت نمونے کی صورت میں سیاحوں کی توجہ کا مرکز بن چکا ہے۔ اس گاؤں کی ایک خصوصیت انتہائی دل چسپ ہے۔ یہاں کے ہر باشندے کے پاس اپنا خود ساختہ ذریعہ سفر ہے جو انہوں نے درختوں کے تنے کاٹ کر کشتیوں کی صورت میں بنایا ہے۔گھروں کے اطراف جھیل کے گہرے پانی کی موجودگی اور آبی شاہراہوں کی وجہ سے ٹوفینو قبیلے کے افراد اپنے پڑوسیوں اور عزیز و اقارب سے ملنے کے لیے بھی کشتیوں پر سفر کرتے ہوئے جاتے ہیں۔

گاؤں کے باشندوں کی گزراوقات کا انحصار کھیتی باڑی پر ہے جو وہ جھیل کے ساحلی علاقوں پر کرتے ہیں لیکن گزشتہ چند سالوں میں یہاں سیاحت، ماہی گیری اور مچھلیوں کی افزائش نسل کی فارمنگ کی صنعت کو فروغ حاصل ہوا۔ حالاں کہ اس گاؤں کو باقاعدہ طور پر سیاحتی مقام کا درجہ نہیں دیا گیا ہے لیکن 31؍اکتوبر 1996ء کو یونیسکو کی جانب سے اسے عالمی ثقافتی ورثہ قرار دیا گیا۔
 

پانی پر تیرتے اس گاؤں میں ہر قسم کی ضروری اشیاء مل جاتی ہیں لیکن ان کے علاوہ یہاں سوفٹ ڈرنک کی ایک دکان بھی ہے۔ یہاں ایک ہوٹل بھی بنا ہوا ہے، لکڑی کے ڈنڈوں اور چوبی تختوں کی مدد سے تعمیر کیے جانے والے اس ہوٹل کے تختوں پر سرخ اور سفید رنگ ک رکے، ان پر چینی انداز میں محرابیں بنائی گئی ہیں، جو انتہائی خوب صورت معلوم ہوتی ہیں۔ ان میں سیاحوں کی رہائش کے لیے تمام بنیادی سہولتیں فراہم کی گئی ہیں لیکن سیر کے لیے آنے والے افراد کی قیام گاہ کے علاوہ یہ ہوٹل گاؤں کے امراء اور بے فکرے نوجوانوں کی تفریح طبع کا مرکز بھی بنا رہتا ہے جہاں لوگ شام ہوتے ہی کشتیوں پر بیٹھ کر آنا شروع ہوجاتے ہیں اور رات گئے تک یہاں مختلف مشاغل میں وقت گزارتے ہیں۔ اس گاؤں میں چھوٹے چھوٹے ریستوران بھی بنے ہوئے ہیں جب کہ گاؤں کے لوگوں کو طبی سہولتوں کی فراہمی کے لیے صحت مرکز بھی بنایا گیا ہے، جس میں خدمات انجام دینے والا ڈاکٹر یہاں سے تھوڑی دور کے فاصلے پر رہتا ہے اور اسے شفا خانے تک پہنچنے کے لیے کشتی پر سفر کر کے آنا پڑتا ہے۔

اس گاؤں کے تمام گھر، دکانیں، ریستوران اور ہوٹل لکڑی کے لمبے لمبے ڈنڈے کھڑے کر کے جھیل کی سطح سے کئی فٹ اونچائی پر بنائے گئے ہیں۔ آبی بستی کے ساتھ کشتیوں پر تیرتا ہوا ایک بازار بھی واقع ہے جہاں خواتین دکان دار مختلف اجناس اور اشیاء فروخت کرتی ہیں۔ اس گاؤں میں اجتماعی زندگی کا رواج ہے اور تمام باشندے پیارمحبت، بھائی چارے اور ایثار و قربانی کے جذبے کے ساتھ زندگی گزارتے ہیں ۔ اس کی بین مثال جھیل کے وسط میں بچوں کے ایک اسکول کی صورت میں موجود ہے۔ یہ درس گاہ مکمل طور سے پانی کے درمیان ایک چھوٹے سے مصنوعی جزیرے پر بنی ہوئی ہے۔اس جزیرے کو وجود میں لانے کے لیے ان کی ہمت ، محنت مشقت اور باہمی اتحاد کےعلاوہ ذہانت کا کافی دخل ہے۔ جزیرے کی تعمیر کے لیے تمام مٹی جھیل کے کنارے پر واقع میدانوں سے لائی گئی ہے جو ایک انتہائی دشوار گزار کام تھا لیکن گاؤں کے باسیوں نے اپنی ہمت و استقامت سے ایک ناممکن کام کو ممکن بنا کے دکھا دیا ۔ گاؤں کے لوگ اردگرد کی پہاڑیوں اور ٹیلوں سے چٹانی پتھر، روڑی کشتیوں میں بھر کر لاتے رہے اور اسے جھیل کی تہہ میں ایک مخصوص مقام پر ڈال کر بھراؤ کرتے رہے ۔ اس کے بعد وہ مٹی بھر کر لائے اور اس سے اتنا بھراؤ کیا کہ وہاں پانی کی جگہ خشک زمین جزیرے کی صورت میں ابھر آئی۔ اس کے بعد انہوں نے یہ درس گاہ بنا کر فن تعمیر کا ایک محیر العقول کارنامہ انجام دیا۔