موسمِ گرما کی آمد اور چند حفاظتی تدابیر٬ حکیم رخِ نسرین آغا

موسمِ سرما اپنے اختتام کی جانب تیزی سے گامزن ہے اور موسمِ گرما کی ابتدا ہونے والی ہے- یہ موسم کی تبدیلی انسانی جسم پر انتہائی گہرے اثرات مرتب کرتی ہے- اگر انسان آنے والے موسم سے قبل خود کو تیار نہ کریں تو وہ اس موسم کی کئی بیماریوں کا شکار بن جاتا ہے- اس لیے ضروری ہے کہ ہم موسمِ گرما کی آمد سے قبل ہی اپنے جسم کو اس کے مطابق ڈھالنا شروع کردیں- اب یہ کیسے ممکن ہے؟ اس کے لیے ہماری ویب کی ٹیم نے معروف حکیم رخِ نسرین آغا سے خصوصی ملاقات کی- اس نشست میں حاصل ہونے والی اہم معلومات یہاں ہماری ویب کے قارئین کی خدمت میں پیش کی جارہی ہیں-

حکیم رخِ نسرین کہتی ہیں کہ “ اگر آپ گرمیوں کی ابتدا سے قبل خود کو صحت مند بنانا چاہتے ہیں اور موسمِ گرما کی محفوظ رہنا چاہتے ہیں تو اپنے جسم کو فاسد مادوں سے صاف کیجیے“-
 

“ اسی طرح آہستہ آہستہ گرم مصالحوں کا استعمال بھی کم کردیں٬ اس کے علاوہ تینوں اقسام کی مرچیں یعنی کالی مرچ٬ لال مرچ اور سبز مرچ کا استعمال بھی گرمیوں میں کم کریں“-

“ لہسن٬ ادرک٬ اجوائن٬ پیاز٬ کلونجی اور رائی دانہ یہ چیزیں بھی گرم ہوتی ہیں- اب چاہے یہ چیزیں کسی نسخے میں شامل ہوں یا پھر آپ انہیں کسی اور طرح لے رہے ہوں ان کا استعمال کم کر دیں- یاد رہے کہ پودینہ بھی گرم ہوتا ہے“-

حکیم رخِ نسرین مزید بتاتی ہیں کہ “ اگر اناج کی بات کی جائے تو اس میں گیہوں اور باجرے کا استعمال کم کیجیے- آپ چاول٬ مکئی اور ساگو دانہ کھائیے- ایسی چیزیں کھائیے جو ٹھنڈی ہوں اور انہیں آہستہ آہستہ اپنی زندگی میں داخل کیجیے“-

“ مشروبات میں چائے٬ کافی اور سبز چائے کو خیرباد کہہ دیجیے- دودھ ٬ لسی اور دودھ سے بنی اشیاﺀ کا استعمال بڑھائیے- اس کے علاوہ پھلوں سے تیار کردہ مشروبات بھی استعمال کیجیے“-

“ کپڑوں اور رہن سہن میں تبدیلی لائیے٬ گرمیوں میں پیاس خود بخود لگتی ہے ایسے میں لیموں کا شربت٬ نیلوفر کا شربت یا اناب کا شربت پیجیے- سردیاں ہوں یا پھر گرمیاں کیمیکل سے بنی اشیاﺀ سے دور رہیے“-