پاکستانی میڈیا کچھ ہوش کے ناخن لو!

موجودہ دور میں باخبر رہنا ہر پاکستانی اپنا حق سمجھتا ہے- صبح اٹھتے ہی سب سے پہلا کام ٹی وی آن کر کے خبروں کا جائزہ لینا اب ایک معمول بن چکا ہے- یہی نہیں گھر سے باہر سے جاتے وقت٬ اور رات کے کھانے کے وقت ٹی وی پر خبریں سننا مرد حضرات کبھی نہیں بھولتے- اس بات کو پاکستانی میڈیا نے خوب کیش کیا اور عوام کی توجہ حاصل کرنے اور TRPs کی دوڑ میں سرفہرست رہنے کے لیے کئی دفعہ من گھڑت اور بےبنیاد باتوں کو بھی خبر بنا کر پیش کیا- ایسا کرنے سے بلاشبہ میڈیا کا وقار اور ساکھ متاثر ہوا ہے-

یہ آرٹیکل انہی کوتاہیوں کی طرف میڈیا کی توجہ مبذول کروانے کے لیے تحریر کیا جارہا ہے-

ہر خبر بریکنگ نیوز نہیں ہوتی
کوئی ہمارے میڈیا کو سمجھائے کہ ہر خبر “ بریکنگ نیوز “ نہیں ہوتی- کسی کی محبت کی کہانی یا میرا کی شادی کی بارے میں خبر آپ اگر چلانا چاہتے ہیں تو انٹرٹینمنٹ کے سیکشن میں چلائیں-

پولیس کے کارناموں کی جعلی کہانیاں
ایسے بےبنیاد اور من گھڑت جعلی پولیس مقابلے اور کرائم اسٹوری ٹی وی پر دکھانے سے بہتر ہے کہ عوام کو کوئی معلوماتی ڈاکیومنٹری پروگرام دکھایا جائے- ٹی وی پر پولیس والوں کی اداکاری دیکھ کر عوام ہنس ضرور سکتی ہے لیکن متاثر نہیں ہوسکتی-

“ امریکہ کے چڑیا گھر میں پانڈے کے بچے کی پیدائش“٬ بےبنیاد خبریں
کسی پانڈہ کے بچے کی پیدائش ہوئی ہو یا پھر پنجاب کے کسی گاؤں میں مرغوں کی لڑائی ہوئی ہو٬ ایسی خبریں عوام کے لیے کبھی بھی اہم نہیں ہوسکتی- لیکن یہ بات ہمارے میڈیا کو کون سمجھائے-

متاثرہ خاندان سے کیے جانے والے عجیب و غریب سوالات
“ آئیے ناظرین امجد صاحب کے بیٹے سے معلوم کرتے ہیں کہ ان کو اپنے والد کے قتل پر کیسا محسوس ہورہا ہے؟“ جتنی تکلیف ہمیں یہ لکھنے میں ہوئی ہے اتنی آپ کو پڑھنے میں بھی ہوئی ہوگی! افسوس ہمارا میڈیا اتنا بےحس ہوچکا ہے کہ کسی خوفناک حادثے یا ایسے المناک واقعات کے موقع پر لواحقین کے جذبات کا بالکل خیال نہیں کرتا اور مائیک لے کر ان کے سر پر پہنچ جاتا ہے-

بےبنیاد پروگرام کا نشر کرنا
صبح سویرے ٹی وی کھولیے اور آپ کو بےشمار مرد اور خواتین رنگ برنگے لباس پہنے ناچتے ہوئے نظر آئیں گے- یہ کسی اداکار کی نقلی شادی کروائی جارہی ہوگی! پاکستانی مارننگ شو میں یہ سب اب معمول بن چکا ہے- آئے دن اس کی بیہودگی میں اضافہ ہوتا جارہا ہے- یہی نہیں بلکہ کرکٹ سے متعلق شو میں کامیڈین اور اداکاروں کو بیٹھا کر تبصرے کرنا اور فضول کامیڈی کسی طرح بھی عوام کو پسند نہیں آسکتی-

نیوز ہیڈ لائن کے دوران موسیقی اور گانے
کسی بھی خبر کے بیک گراؤنڈ میں موسیقی یا گانا چلانا ایک عام سی بات ہے- لیکن اچھی بھلی خبر کے بیچ میں گانے چلانے کی بھلا کیا تُک بنتی ہے-