تاریخ کا امیر ترین مسلمان حکمران٬ بل گیٹس کچھ بھی نہیں

اگر کوئی پوچھے کہ دنیا کا امیر ترین شخص کون ہے تو ہمارے ذہن میں بل گیٹس٬ راک فیلر٬ وارن بفٹ٬ کارلوس سلم یا روتھ چلڈ کے خاندان میں سے کسی فرد کا نام آتا ہے- لیکن تاریخ دانوں کے مطابق دنیا کا سب سے امیر ترین شخص مسلمان بادشاہ منسا موسیٰ تھا- افریقہ کی مالی سلطنت کے حکمران منسا موسیٰ نے 1312ﺀ سے 1337ﺀ تک حکومت کی- اس مضمون کا مقصد منسا موسیٰ کی زندگی کے ان پہلوؤں کو اجاگر کرنا جن سے بہت سے لوگ ناواقف ہیں-
 

بادشاہوں کا بادشاہ
مالی کے حکمران موسیٰ اول کو ان کی زندگی میں کئی ناموں سے جانا جاتا تھا جس میں “مالی کا آمر“ ٬ “غرناطہ کا فاتح“ اور “شیرِ مالی“ قابلِ ذکر ہیں- مغربی دنیا میں وہ منسا موسیٰ کے نام سے مقبول ہوئے- موسیٰ ایک اسلامی نام ہے جس کے معنی “ بادشاہوں کا بادشاہ “ کے ہیں-

حج کا مشہور سفر
منسا موسیٰ نے 1324ﺀ میں حج کا مشہور سفر کیا جو تاریخ میں ایک خاص حیثیت رکھتا ہے- سفر کے دوران مال و دولت کی ایسی بھرپور نمائش کی گئی کہ دیکھنے والے دنگ رہ گئے- حج کے اس سفر نے جہاں دنیا کو مالی کی بےتحاشا دولت سے روشناس کروایا وہیں منسا موسیٰ ایک مقبول شخصیت بن کر ابھرے-

حج کا سفر اور دولت کا بے دریغ استعمال
منسا موسیٰ کا کاروان 60 ہزار افراد پر مشتمل تھا جس میں 12 ہزار غلام بھی شامل تھے- یہ تمام افراد فارسی ریشم کے لباس زیب تن کیے ہوئے تھے- موسیٰ گھوڑے پر سوار 500 غلاموں کے ہمراہ بےتحاشا سونے سے آراستہ ہو کر سفر کر رہا تھا- اس کے علاوہ 80 اونٹوں کا دستہ بھی ساتھ تھا جن میں ہر اونٹ پر 300 پونڈ سونا لدا ہوا تھا- دورانِ سفر موسیٰ جس شہر سے گزرتے وہاں کی عوام میں سونا بانٹتے رہتے-

منسا موسیٰ کی فراخدلی بحیرہ روم میں مہنگائی کا سبب
وہ تمام شہر جہاں منسا موسیٰ نے سفر کیا وہاں سونے اور تحائف کی بےتحاشا تقسیم سے مارکیٹ پر واضح فرق پڑا- قاہرہ٬ مدینہ اور مکہ جیسے شہروں میں اچانک سونے کی ریل پیل ہونے سے سونے کی قدر میں کمی واقع ہوگئی- اس وجہ سے مہنگائی بڑھی اور اشیاﺀ کی قیمتیں آسمانوں کو چھونے لگیں-

منسا موسیٰ کے دور میں مشہور عمارات کی تعمیر
مکہ سے واپسی کے بعد موسیٰ نے بےشمار تعمیرات کے منصوبے شروع کیے- بہت سی مساجد اور تعلیمی ادارے ٹمبکٹو اور گاؤ میں تعمیر کیے گئے- منسا موسیٰ کے شاندار محل کی تعمیر کے لیے معماروں کو اسپین اور قاہرہ بھیجا گیا- مشہور سنکور یونیورسٹی کا قیام بھی اسی دور میں عمل میں آیا-