دنیا کے خوبصورت ترین جانور

ہماری زمین ہزاروں اقسام کے جانوروں سے بھرپور ہیں- ان جانوروں میں سے کچھ اچھے ہیں٬ کچھ برے ہیں اور کچھ خوبصورت ہیں- لیکن یہ بھی حقیقت ہے کہ تمام خوبصورت دکھائی دینے والے جانور معصوم نہیں ہوتے بلکہ بعض انتہائی خطرناک بھی ہوتے ہیں- تاہم یہاں ایسے جانوروں کا ذکر کرنے جارہے ہیں جنہیں دنیا کے چند خوبصورت ترین جانور ہونے کا اعزاز حاصل ہے-

Little Penguins
شاید ہی کوئی ان چھوٹی جسامت کی حامل پینگوئن سے زیادہ دنیا میں کوئی اور خوبصورت جانور ہو- یہ پینگوئن کی ایک خاص قسم ہوتی ہے جو جسامت کے حوالے سے پینگوئن کی دیگر اقسام کے مقابلے میں کچھ چھوٹی ہوتی ہے- اور چھوٹی ہونے کی وجہ سے ہی یہ انتہائی معصوم اور خوبصورت دکھائی دیتی ہے-

Northern Pygmy Owls
مختصر جسامت کا حامل یہ الو مغربی شمالی امریکہ میں پایا جاتا ہے- الو کی اس قسم میں بالغ الو کا سائز بھی 15 سے 17 سینٹی میٹر یعنی تقریباً 6 انچ تک ہوتا ہے- ان الو کا تعلق الوؤں کی سب سے چھوٹی جسامت والی اقسام میں ہوتا ہے- یہ الو تین رنگ میں پائے جاتے ہیں جن میں سرمئی اور گدلا بھورا رنگ اور بادامی سرخ شامل ہیں-

Koala Bears
اس جانور کو اس کے بڑے گول سر٬ عجیب و غریب کانوں اور چمچ جیسی ناک کی وجہ سے باآسانی پہچان لیا جاتا ہے- اس جانور کی لمبائی 60 سے 85 سینٹی میٹر جبکہ وزن 4 سے 15 کلو گرام تک ہوتا ہے- یہ ایک خوبصورت جانور قرار دیا جاتا ہے اور یہ چہرے سے انتہائی معصوم معلوم ہوتا ہے-

Arctic Foxes
آرکٹک لومڑیوں کو قطبی لومڑیاں یا پھر برفانی لومڑیاں بھی کہا جاتا ہے- لومڑیوں کی یہ قسم انتہائی سرد موسم میں بھی زندہ رہ سکتی ہے- یہ لومڑیاں منفی 70 ڈگری سینٹی گریڈ کے موسم کو بھی برداشت کرنے کی صلاحیت رکھتی ہیں- یہ خوبصورت لومڑیاں ایسے جسم کی مالک ہوتی ہیں جو کہ گرمائش کو باہر نکلنے سے روکنے کی صلاحیت رکھتا ہے-

Red Pandas
یہ لال رنگ کا پانڈا مشرقی ہمالیہ اور جنوب مغربی چین سے تعلق رکھتا ہے- اگرچہ اس جانور کے نام کے ساتھ پانڈا لگا ہے لیکن جینیاتی طور پر دیوقامت پانڈا سے اس کا کوئی تعلق نہیں ہے- اس کی ٹانگیں کافی چھوٹی ہوتی ہیں اور یہ گھریلو پالتو بلی سے کچھ تھوڑا ہی بڑا محسوس ہوتا ہے- تاہم لال پانڈا بھی معدومی کے خطرے سے دوچار ہے-

Pomeranian Dogs
ان کتوں کو کھلونا کتوں کے طور پر بھی جانا جاتا ہے جس کی وجہ ان کا مختصر ہونا اور خوبصورت دکھائی دینا ہے- بظاہر یہ کتے ایک ٹیڈی بئیر کی مانند دکھائی دیتے ہیں- یہ ہوتے تو چھوٹی جسامت کے حامل ہیں لیکن ان کی یہی چھوٹی جسامت ان کی مقبولیت کی وجہ بھی ہے-

Bunnies
یہ چھوٹے خرگوش انتہائی خوبصورت اور معصوم ہوتے ہیں اور دنیا بھر میں ایک پالتو جانور کے حوالے سے انتہائی مقبول ہیں- یہ خرگوش متعدد رنگوں میں پائے جاتے ہیں- تاہم ان کے دانت انتہائی تیز ہوتے ہیں اور یہ انسانی کھال کو نوچ لیتے ہیں اس لیے بچوں کو ان سے دور رکھنا ہی بہتر ہے-