دنیا بھر میں نافذ چند دلچسپ اور عجیب قوانین

دنیا بھر کی حکومتیں اور ریاستیں اپنی مختلف ضرورتوں اور امن و مان کی صورتحال قائم رکھنے کے لیے قوانین بناتی رہتی ہیں- لیکن دنیا کے چند ممالک میں ایسے دلچسپ اور عجیب قوانین بھی موجود ہیں جن کے نافذ کرنے کی بظاہر کوئی خاص وجہ سمجھ نہیں آتی- یہاں ہم دنیا بھر میں موجود چند ایسے ہی عجیب و غریب قوانین کا ذکر کر رہے ہیں-

نیو جرسی میں کسی کو قتل کرتے ہوئے قاتل کا بلٹ پروف جیکٹ پہنے ہونا بھی غیر قانونی ہے اور یوں قاتل کو قتل کے جرم میں دی جانے والی سزا کے علاوہ بلٹ پروف جیکٹ پہننے کی سزا بھی بھگتنا ہوتی ہے-

فن لینڈ میں ٹریفک قوانین کی خلاف ورزی کا جرمانہ خلاف ورزی کرنے والے کی آمدنی کے حساب سے کیا جاتا ہے- جنوری 2002 میں فن لینڈ میں نوکیا کمپنی کے ڈائریکٹر Anssi Vanjoki کو تیز رفتاری کی وجہ سے 12.5 ملین ڈالر کا جرمانہ کیا گیا-

کینیڈا کے قوانین کے مطابق آپ کسی بھی چیز کو خریدنے کے بعد اس کی رقم کی مکمل ادائیگی صرف سِکوں کی صورت میں نہیں کرسکتے بالخصوص اگر آپ نے کوئی ایسی چیز خریدی ہو جس کی مالیت 10 ڈالر سے زائد ہو-

میسوری میں پیلے رنگ کی مارجرین پر پابندی عائد ہے- میسوری میں 19ویں صدی کے ایک قانون کے مطابق پیلے رنگ کی مارجرین فروخت نہیں کی جاسکتی-

قدیم انگلینڈ کے عجیب قوانین کے مطابق رائل پیلس جو پارلیمنٹ ہاؤس ہے میں کسی بھی شخص کو مرنے کی اجازت نہیں ہے- قانون کے مطابق “ کوئی بھی شخص جس کا انتقال پارلیمنٹ میں ہو وہ ریاستی سطح پر سوگ کا حقدار قرار پاتا ہے اس لیے پارلیمنٹ ہاؤس میں موجود اگر کوئی شخص خود کو بیمار محسوس کرے تو فوراً باہر نکل جائے“-

الباما میں ریچھ کے ساتھ لڑائی پر پابندی عائد ہے- ایک وقت تھا جب امریکی ریاستوں میں ریچھ کے ساتھ لڑائی ایک مقبول ترین کھیل تھا اور الباما کو اس کھیل کے حوالے سے ایک خاص مقام حاصل تھا- تاہم 2006 میں ریچھ کا استحصال روکنے کے لیے وہاں اس کھیل پر پابندی لگا دی گئی-

الاسکا میں کسی بھی بیوٹی سیلون میں اپنے پالتو جانور کو ساتھ لانا منع ہے- اس کے علاوہ الاسکا میں ایسے عوامی مقامات پر بھی پالتو جانوروں کو ساتھ رکھنے پابندی ہے جہاں مختلف کھانے کی اشیاﺀ فروخت ہورہی ہوں-

آپ نے یہ تو سنا ہوگا کو کوکین کی خریدو فروخت جرم ہے لیکن کیا آپ جانتے ہیں کہ ایریزونا میں جعلی کوکین رکھنا بھی ایک جرم ہے- جی ہاں ایریزونا میں نہ جعلی کوکین تیار کی جاسکتی ہے اور نہ ہی فروخت-

Ohio میں چوزوں پر رنگ کرنا قانوناً جرم ہے- اور یہ پابندی صرف چوزوں کو رنگنے تک ہی محدود نہیں بلکہ کوئی بھی شخص یا کمپنی ایسے چوزوں کو فروخت کے لیے پیش بھی نہیں کرسکتی جنہیں کسی اور رنگ میں ڈھالا گیا ہو-

بھارتی ریاست آندھرا پردیش میں امتحانات کے دوران نقل کرتے ہوئے پکڑے جانے پر 10 سال کی قید ہوسکتی ہے- یہ قانون 1997 میں “ تعلیمی امتحانات میں غیر منصفانہ عمل “ کو روکنے کے لیے پاس کیا گیا-

< Previous ناقابلِ یقین کیڑے اور حیرت انگیز خصوصیات NEXT > مردہ اژدھا کا زندہ ہونا اور ہمارا نفس