چینی صحرا میں پائی جانے والی پراسرار جھیلیں

بادین جاراں ( Badain Jaran ) چین کا ایک ایسا صحرا ہے جو بیک وقت دو ممالک چین اور منگولیہ میں پھیلا ہوا ہے- 49 ہزار اسکوائر کلومیٹر کے طویل رقبے پر پھیلا یہ صحرا چین کا تیسرا بڑا صحرا ہے-

اگرچہ اس صحرا سے زیادہ تر لوگ واقف نہیں لیکن پھر بھی اپنے بلند و بالا ٹیلوں کے باعث یہ صحرا سیاحوں کے درمیان کسی حد تک مقبول ضرور ہے-

اس صحرا میں پائے جانے والے بعض ٹیلوں کی بلندی 500 میٹر سے بھی زیادہ ہے-

یہ ایک انتہائی خشک آب و ہوا کا حامل صحرا ہے جہاں سالانہ صرف 50 سے 60 ملی میٹر کے درمیان بارش ہوتی ہے-

اس صحرا میں 40 سے 80 مرتبہ ہونے والی بارش کا پانی زمین پر پڑنے سے قبل ہی آبی بخارات بن کر واپس ہوا میں تحلیل ہوجاتا ہے-

لیکن اس انتہائی خشک موسم کے باوجود جو اس صحرا کی قابل ذکر خصوصیت ہے وہ یہاں پائی جانے والی 140 مستقل جھیلیں ہیں- یہ جھیلیں مختلف ٹیلوں کے درمیان واقع ہیں-

صحرا میں موجود ان جھیلوں کو “ پراسرار جھیلیوں “ کے نام سے جانا جاتا ہے کیونکہ کوئی نہیں جانتا ان جھیلوں میں پانی کہاں سے آتا ہے؟-

ان پراسرار جھیلوں کے حوالے سے اکثر ماہرین کا ماننا ہے کہ یہ زیرِ زمین موجود پانی کے چشموں سے بھرتی ہیں- اور یہ پانی بہاؤ کی وجہ سے مختلف ٹیلوں کے درمیان ظاہر ہوتا ہے جہاں وہ ایک ذخیرے کی صورت میں جمع ہوجاتا ہے-

اس زیرِ زمین بہنے والے پانی کا ذریعہ وہ بارشیں اور پگھلتی برف ہے جو اس صحرا کے اردگرد موجود سینکڑوں کلومیٹر کے فاصلے پر واقع پہاڑوں پر پڑتی ہے-

ماہرین کا خیال ہے کہ پہاڑوں کی ٹوٹی ہوئی چٹانوں سے نکلنے والا یہ پانی صحرا کی گہرائی میں جا پہنچتا ہے اور صحرا میں مختلف جھیلوں کی صورت میں ظاہر ہوتا ہے-

اگرچہ چشموں سے آنے والا پانی میٹھا ہوتا ہے لیکن صحرا میں پائی جانے والی زیادہ تر جھیلیں نمکین پانی کی حامل ہیں-

ان جھیلوں میں بڑے پیمانے پر معدنیات٬ جھاڑیاں اور الجائی پائی جاتی ہے جس کی وجہ سے جھیلوں کا ظاہری رنگ بھی تبدیل ہوجاتا ہے- اور ان میں بعض جھیلوں کا پانی تو حد سے زیادہ نمکین ہے-

صحرا میں موجود میٹھے پانی کی جھیلیں ان مویشیوں کو زندگی فراہم کرتی ہیں جو سفر کے دوران یہاں سے گزرتے ہیں- اس کے علاوہ جھلیوں کے اردگرد بڑے پیمانے پر ہریالی بھی پائی جاتی ہے-

تاہم حالیہ چند دہائیوں سے بعض جھیلوں کا سائز مختصر ہوگیا ہے جبکہ کچھ تو مکمل طور پر غائب ہوچکی ہیں- اس سب کی وجہ زیرِ زمین موجود پانی میں واقع ہونے والی کمی ہے-