کولما٬ مُردہ افراد کا قصبہ٬ زندہ انسانوں کے لیے عجیب راز

سان فرانسسکو کے جنوب میں موجود Daly شہر کے قریب Colma نامی قصبہ واقع ہے جسے مردوں کا قصبہ کہا جائے تو کچھ غلط نہ ہوگا کیونکہ یہاں 2 اسکوائر میل سے بھی کم رقبے پر پھیلے اس قصبے میں 17 قبرستان موجود ہیں جن میں 1.5 ملین افراد دفن ہیں-

مردوں کی یہ تعداد قصبے کے زندہ رہائشیوں سے بہت زیادہ ہے یہاں تک کہ ایک زندہ شخص کے مقابلے میں ہزاروں مردہ افراد اس قصبے کے قبرستانوں میں دفن ہیں-
 

بنیادی طور پر یہاں کے زیادہ تر رہائشی قبریں کھودنے٬ پھول اگانے اور یادگاریں تیار کرنے کا کام کیا کرتے تھے- 1980 کے بعد یہاں دیگر کاروباروں سے منسلک افراد نے بھی رہائش اختیار کی- آج یہاں کئی قسم کے کاروبار کیے جاتے ہیں جن میں گاڑیوں کی ڈیلر شپ اور شاپنگ سینٹرز بھی شامل ہیں- حالیہ چند سالوں میں باکسنگ کے مقابلوں کا بھی انعقاد کیا گیا ہے-

چھوٹے سے قصبے میں لاکھوں مردہ افراد کیسے؟
اس قصبے کی اصل تاریخ کا تعلق 19ویں صدی کے وسط سے ہے جب کیلیفورنیا میں سونے کی دوڑ شروع ہوئی اور کم وقت میں امیر ہونے کا لالچ رکھنے والے لاکھوں افراد نے کیلیفورنیا کا رخ کیا جن میں معدنیات تلاش کرنے والے٬ تاجر اور دیگر تارکین وطن شامل تھے- ان میں ہزاروں افراد نے سان فرانسسکو میں سکونت اختیار کرلی-