خاتون نے اپنے ہاتھ پاؤں جان بوجھ کر کٹوائے

ایک نوجوان ویتنامی خاتون نے اس وقت پولیس کو شدید حیرت میں مبتلا کردیا جب خاتون نے انکشاف کیا کہ “میں نے اپنا ایک ہاتھ اور ایک پاؤں کاٹنے کے لیے خود ایک شخص کو رقم دے کر اس کام کے لیے آمادہ کیا تھا“ - اس نوجوان خاتون کے مطابق اس نے یہ سب ہیلتھ انشورنس کی رقم کے حصول کے لیے کیا-

انشورنس کی رقم کے حصول کے لیے اس دھوکے بازی کا آغاز رواں سال مئی میں اس وقت ہوا جب ایک Ly Thi N نامی ویتنامی خاتون نے اپنے ایک واقف کار کو اس بات کے لیے راضی کیا کہ وہ خاتون کا ایک ہاتھ اور ایک پاؤں کاٹے گا جس کے بدلے خاتون کی جانب سے اسے 2200 ڈالر کی رقم ادا کی جائے گی-

منصوبہ کچھ یوں تھا کہ پولیس کے سامنے اس سب کی وجہ “ ٹرین کی ٹکر “ قرار دیا جائے گا-

منصوبہ بندی کے مطابق خاتون کے واقف کار Doan Van D نے ہنوئی کے ریلوے ٹریک کے قریب سے خود ہی ایمبولینس کے ذریعے خاتون کو زخمی حالت میں اسپتال روانہ کیا اور ساتھ ہی پولیس کو اس “ حادثے “ کے بارے میں اطلاع دی اور اپنے آپ کو ایک اجنبی ظاہر کیا جس نے ٹریک کے پاس سے گزرتے ہوئے خاتون کو زخمی حالت میں دیکھا اور اس کی مدد کی-

دوسری جانب خاتون نے بھی یہی بیان دیا کہ وہ ریلوے ٹریک پار کرتے ہوئے ٹرین کی ٹکر سے زخمی ہوگئی تھی اور اس اجنبی نوجوان نے اس کی مدد کی اور اس کی زندگی بچائی-

ابتدا میں شخص خاتون کو خوش قسمت قرار دے رہا تھا کہ جس کی اتنے بڑے حادثے میں جان بچ گئی- لیکن پولیس کو تحقیقات کے دوران ان دونوں دھوکے بازوں کے بیان کچھ مشکوک معلوم ہوئے اور جلد ہی خاتون نے اپنے اس گھناؤںے جرم کا اعتراف بھی کرلیا-

پولیس کی تفتیش میں یہ انکشاف ہوا کہ خاتون نے اس حادثے سے کچھ عرصہ قبل ہی ایک بہت بڑی ہیلتھ انشورنس پالیسی حاصل کی تھی اور کسی حادثے کی صورت میں انشورنس پالیسی کے مطابق انشورنس کمپنی کی جانب سے خاتون کو 1 لاکھ 80 ہزار ڈالر کی رقم ادا کی جاتی-

تاہم اب خاتون نہ صرف اتنی بڑی رقم سے محروم ہوئی بلکہ اپنا پاؤں٬ اپنا ہاتھ اور اپنے 2200 ڈالر بھی گنوا بیٹھی اور عمر بھر کے لیے معذوری کا شکار ہوگئی-

< Previous ناقابلِ یقین کیڑے اور حیرت انگیز خصوصیات NEXT > مردہ اژدھا کا زندہ ہونا اور ہمارا نفس