پوکیمون گو٬ جس نے آتے ہی دنیا بھر میں تہلکہ مچا دیا

زمانہِ حاضر اپنی ایجادات کی بنا پر جانا جاتا ہے- آئے دن نت نئی چیزیں متعارف کروائی جاتی رہتی ہیں جو اپنے اچھوتے پن کی وجہ سے عوام الناس میں خاصی مقبولیت حاصل کرتی ہیں- ایسا ہی ایک موبائل گیم پوکیمون گو ( Pokemon Go ) بھی ہے-

پوکیمون گو درحقیقت ایک موبائل ویڈیو گیم ہے جس نے اپنے منفرد کھیل کے انداز کی بدولت انٹرنیٹ کی دنیا میں تہلکہ مچایا ہوا ہے- اگر آپ فیس بک یا ٹوئیٹر پر موجود ہیں تو آپ نے اس حوالے سے متعدد پوسٹ ضرور دیکھی ہوں گی-
 

پوکیمون گو - ایک جائزہ:
پوکیمون گو دراصل ایک ایسا کھیل ہے جو حقیقی اور غیر حقیقی دنیا کو آپس میں جوڑتا ہے- آپ اپنے موبائل پر یہ گیم کھیلتے ہوئے چہل قدمی کر رہے ہوں تو حقیقی دنیا کے مختلف مقامات پر پوکیمون کو تلاش کرنے لگتے ہیں- اور جیسے ہی پوکیمون دائرے میں آئے Capture کے بٹن کی مدد سے تربیت دیتے ہیں-

آپ کھیل میں موجود تربیت کار کے لباس اور لوازمات کو تبدیل بھی کرسکتے ہیں- یہ تبدیلیاں آپ کے کھیل پر اثر انداز نہیں ہوتیں-

جیسے جیسے آپ کھیل میں آگے بڑھتے جاتے ہیں اور آگے کے لیول پر پہنچتے ہیں تو آپ زیادہ طاقتور پوکیمون کو پکڑ سکتے ہیں- اس کے علاوہ آپ کی رسائی گیم کی طاقتور اشیاﺀ تک ہوجاتی ہے جن کی مدد سے آپ مزید طاقتور پوکیمون کو پکڑ سکتے ہیں جو کہ نچلے لیول کے پلئیرز کو دستیاب نہیں ہوتا-

جیسے جیسے آگے کے لیول میں پہنچتے ہیں اور اپنے پوکیمون کی تربیت کرتے ہیں آپ کو تین میں سے ایک ٹیم کے ساتھ جڑنے کی دعوت دی جاتی ہے- یہاں سے آپ کی رسائی gyms تک ہوجاتی ہے جہاں آپ اپنے پسندیدہ پوکیمون کو مختلف پلئیرز سے لڑنے کے لیے منتخب کرتے ہیں- اگر مخالف ٹیم آپ کے gym پر قابض ہوجائے تو آپ کے پاس ان کو جنگ کی دعوت دے کر اپنے gym واپس حاصل کرنے کا موقع ہوتا ہے-