ایشیا کے خوبصورت ترین اور دلچسپ سیاحتی مقامات

ہماری یہ دنیا عجیب و غریب٬ دلچسپ اور خوبصورت مقامات سے بھری پڑی ہے اور شوقین افراد ان مقامات کو دیکھنے کے لیے سفر بھی کرتے ہیں- اگر ہم بات کریں صرف ایشیا کے خوبصورت ترین مقامات کی تو آپ کو یہ جان کر ضرورت حیرت ہوگی کہ یہاں پر کئی ایسے سیاحتی مقامات موجود ہیں جو اپنی خوبصورتی کے علاوہ مزیدار کھانوں اور ناقابلِ یقین تاریخ کی وجہ سے بھی مقبول ہیں- ایشیا کے چند ایسے ہی چند خوبصورت اور دلچسپ سیاحتی مقامات کو مدِنظر رکھتے ہوئے Lonely Planet نے ایک فہرست مرتب کی ہے جس کے مطابق ایشیا کے 10 بہترین سیاحتی مقامات میں مندرجہ ذیل مقامات شامل ہیں-
 

Hokkaidō
جاپان کا یہ مقام اپنے گرم چشموں اور برفانی پہاڑوں کی وجہ سے مشہور ہے- تاہم بیشتر سیاح اس خوبصورت جاپانی جزیرے سے ناواقف ہیں- یہ جزیرہ جاپان کے انتہائی شمالی حصے میں واقع ہے- ٹوکیو سے چلنی والی ایک نئی بلٹ ٹرین نے اس مقام تک رسائی آسان بنا دی ہے-

Shànghǎi
شنگھائی چین کا سب سے بڑا شہر ہے اور اس کی آبادی 24 ملین افراد سے زائد ہے- حال ہی میں شنگھائی میں چین کا سب سے پہلا ڈزنی ریزورٹ کھولا گیا ہے اور امید ظاہر کی جارہی ہے کہ یہ ریزورٹ سیاحوں کی ایک بڑی تعداد کو اپنی جانب متوجہ کرے گا- سیاحوں کے لیے شنگھائی میں دنیا کا دوسرا بلند ترین شنگھائی ٹاور بھی موجود ہے-

Jeonju
جنوبی کوریا کا یہ شہر اپنے مزیدار کھانوں کے حوالے سے مشہور ہے- یہاں سیاحوں کو انتہائی لذیز کھانے پیش کیے جاتے ہیں جنہیں دیکھتے ہی منہ میں پانی آنا شروع ہوجاتا ہے- اس شہر کو بہترین کھانوں کے حوالے جنوبی کوریا کا سب سے اعلیٰ مقام قرار دیا جاتا ہے-

Con Dao Islands
ویتنام میں واقع یہ جزائر سیاحوں کے لیے انتہائی پرکشش ثابت ہوتے ہیں- یہ جزائر نہ صرف اپنی خوبصورتی کے حوالے سے شہرت رکھتے ہیں بلکہ یہاں بہترین سمندری غذائیں بھی پیش کی جاتی ہیں- اس کے علاوہ ویتنام کے شہر Ho Chi Minh سے ان جزائر تک رسائی حاصل کرنے کے لیے فلائٹس کے نظام کو بھی بہتر بنایا گیا ہے-

Hong Kong
ہانگ کانگ ایک سابقہ برٹش کالونی اور آج جنوب مشرقی چین کا ایک جدید شہر ہے جو اپنی بلند و بالا عمارات کی وجہ سے مشہور ہے- ہانگ کانگ کے قدرتی ورثے جیو پارک (geopark) کو بہت اہمیت حاصل ہے- اس مقام پر موجود قدیم چٹانوں کی تراش خراش دیکھنے سے تعلق رکھتی ہے-

Ipoh
یہ شہر ملائیشیا کی ریاست پیراک کا دارالحکومت ہے- اس شہر کو اپنے کھانوں٬ بوتیک اور کیفے کی بدولت بےپناہ شہرت حاصل ہے- اس شہر کے مرکز میں واقع Sekeping Kong Heng نامی ہوٹل بھی سیاحوں کے لیے دلچسپی کا باعث بنتا ہے-

Pemuteran
یہ ایک سمندری ساحل ہے جو کہ انڈونیشیا کے شہر بالی کے انتہائی شمال مغربی حصے میں واقع ہے- یہ ایک انتہائی خوبصورت ساحل ہے اور یہاں کی سیر ہر سیاح کی دیرینہ خواہش ہوتی ہے- اور یہاں موجود آرٹ سے بھرپور ریزورٹ اور ریسٹورنٹ بھی دلچسپی سے خالی نہیں ہیں-