کسی بھی ملک کی زبان اس کی پہچان ہوتی ہے
اور ملک و قوم کی ثقافت اور معاشرت کو اجاگر کرنے میں زبان اہم کردار ادا
کرتی ہے۔اردو پاکستان کی قومی زبان ہے جو بہترین ادب سے مالامال ہے۔ بات
چاہے شاعری کی ہو یا فکشن ونان فکشن کی اردوادب میں باکمال ادبی شخصیات
پائی جاتی ہیں ۔ ماضی میں اردو زبان کی ترقی وترویج کیلئے بہت سی تحریکیں
بھی چلائیں گئیں لیکن موجودہ دور پر نظر ڈالی جائے تو معلوم ہوتا ہے کہ
لوگوں کے لئے اردو ادب ثانوی حیثیت اختیار کر گیاہے۔اور چند لوگ جو اردو
ادب کو پڑھنے کا شغف رکھتے ہیں آج کے اس گہماگہمی کے دور میں انکے پاس اتنا
وقت نہیں کہ لائبریروں میں جا کر اپنی پسندیدہ کتب کی چھانٹ پھٹک کر سکیں ۔
لیکن آج کے اس انٹرنیٹ اور سمارٹ فونز کے دور میں ای بکس (الیکٹرانک بکس)
نے اس پریشانی سے ہمیں نجات دلا دی ہے۔ الیکٹرانک بکس سے مراد وہ کتب ہیں
جنھیں با آسانی دنیا کے کسی بھی کونے میں بیٹھ کر کمپیوٹر اور سمارٹ فونز
کے ذریعے پڑھا جا سکتا ہے۔جسے ہم ای ریڈنگ کا نام دیتے ہیں۔اردو ادب کو
لوگوں میں عام کرنے کے لئے ویسے تو مختلف ویب سائٹس پر ہمیں اسکین کی ہوئی
کتب دستیا ب ہیں جنھیں پڑھتے ہوئے ہمیں خاصی دشواری کا سامنا کرنا پڑتا
ہے۔اس دشواری سے چھٹکارا پانے کے لئے حال ہی میں اینڈرائیڈ ایپ’’کتاب‘‘کا
آغاز کیا گیا۔’’کتاب‘‘پہلا اینڈرائیڈ ای ریڈر اور ای پبلشر ایپ ہے جس نے
اردو ادب اور ٹیکنالوجی کو ہم آہنگ کیااور جو کے عالمی رائج شدہ ای ایپ
فارمیٹ پر مشتمل ہے۔’’کتاب ‘‘ سے نہ صرف پڑھنے والے مستفید ہوسکتے ہیں بلکہ
یہ مصنفین کیلئے بھی ایک بہترین پلیٹ فارم ہے جس سے وہ جملہ حقوق کی مکمل
پاسداری کیساتھ اپنی کتب لوگوں تک پہنچاسکتے ہیں۔
’’کتاب‘‘کی آن لائن لائبریری بالکل مفت کلاسیکی اور آزاد کتب پرمشتمل ہے
جہاں سے ہم متعلقہ موضوع میں جا کر اپنی پسند کی کتاب ڈاؤن لوڈ کر کے آف
لائن بھی اس کا مطالعہ بآسانی کر سکتے ہیں۔اسکے علاوہ ’’کتاب‘‘بنانے والوں
کا کہنا ہے کہ وہ اپنی آن لائن لائبریری کو دن بہ دن بڑھا رہے ہیں اور اس
کے لئے زیادہ سے زیادہ مصنفین اور ناشرین سے رابطہ کیا جا رہاہے ۔مزید یہ
کہ ’’کتاب‘‘ کے آنے والے ورژن میں مصنفین اپنی ای بکس کو مکمل ڈجیٹل رائٹ
مینجمنٹ سسٹم کیساتھ اپنی کتب کو فروخت کرسکیں گے۔ویسے تو ہمیں اردو ادب کے
حوالے سے انٹرنیٹ اور اینڈرائیڈ پر بہت سی کتب مل سکتی ہیں لیکن ’’کتاب‘‘
کی چند خصوصیات ہیں جو اسے دوسروں سے ممتاز بناتی ہیں۔
’’کتاب‘‘میں ہم رسم الخط اور پس منظر کو اپنی مرضی کے مطابق تبدیل کر سکتے
ہیں۔
رات کو مطالعہ کرنے کے شوقین افراد اب انداز شب کے ذریعے کمرے کی روشنی بند
کر کے آنکھوں کو تکلیف دیے بغیر بآسانی پڑھ سکتے ہیں۔
فہرست مضامین میں سے کسی بھی باب پر بآسانی ایک ٹیپ سے جایا جاسکتا ہے۔اس
کے علاوہ آخری بار ایپ کھولتے وقت جو کتاب جہاں تک پڑھی تھی دوبارہ ایپ
کھولنے پر وہیں سے شروع کی جاسکتی ہے۔
دوسری ایپس کے برعکس ’’کتاب‘‘ میں سوشل میڈیا شیئرنگ کا نیا انداز ہے ۔جس
کے ذریعے ہم اپنی پسند کی عبارت منتخب کر کے اپنے احباب کے ساتھ تصویری شکل
میں شیئر کرسکتے ہیں۔
اردو ادب کے ساتھ ساتھ انگریزی ادب کے شوقین افراد نہ صرف انگریزی کتب کا
مطالعہ کرسکتے ہیں بلکہ انٹرفیس کی زبان بھی انگریزی میں منتخب کی جاسکتی
ہے۔
بہترین ادب کا مطالعہ معاشرے کے افراد کی اخلاقی اقدار کو سنوارنے کا اہم
ذریعہ بن سکتا ہے۔’’کتاب‘‘کی ای پبلشنگ اور ای ریڈنگ کے ذریعے اردو ادب کو
لوگوں میں عام کرنے اور اسکی حفاظت کی کاوش یقینا قابل ستائش ہے اور اس کے
ذریعے ڈیجیٹل سطح پر اردو زبان کی ترقی کے نئے در وا ہونگے۔
|