ڈس ایبل آل راﺅنڈر شیر علی آفریدی کے لئے عالمی اعزاز

ہمت مرداں مدد خدا کا محاورہ اردو بولنے اور پڑھنے والے افراد اس وقت سے سنتے چلے آ رہے ہیں جب سے دنیا میں یہ زبان تخلیق ہوئی۔ اکثر و بیشترکسی کا حوصلہ بڑھانے کے لئے بھی اس محاورے کو استعمال کیا جاتا ہے۔تاہم دنیا میں کبھی کبھی ایسی شخصیات سامنے آ جاتی ہیں جنہیں دیکھتے ہی زبان سے بے ساختہ یہ محاورہ رواں ہوجاتا ہے۔صوبہ کے پی کے میں باڑ ہ ، خیبر ایجنسی سے تعلق رکھنے والے شیر علی آفریدی کا تعلق بھی ان شخصیات میں سے ایک ہے جو دنیا کی نظروں میں ” نا ممکن “ نظر آنے والے اہداف کو محض اپنی قوت ارادی اور سخت محنت سے حاصل کر لیتے ہیں۔
 

 2012 میں پاکستان ڈس ایبلڈ کرکٹ ٹیم نے انڈیا کادورہ کیا اور وہاں ہم نے انڈیا کے ساتھ T20 سیریز کھیلی جس میں ہم نے انڈیا کو انڈیا میں ہی 3-0 سے شکست دے دی۔ اس کے بعد افغانستان نے پاکستان کا دورہ کیا اور اس کے بعد ہم نے 2013 میں پھر انڈیا کا دورہ کیا۔ اس کے بعد2014 میں پاکستان ڈس ایبلڈ ٹیم نے سویٹزر لینڈ اور فرانس کا دورہ کیا جہاںپر ہمارے میچز مختلف کلب کے ساتھ تھے اور سب کے سب نارمل پلیئر تھے۔ وہاں پر میری باؤلنگ سپیڈ 132 کلومیٹر فی گھنٹہ تھی۔ وہاں پر ہم نے چار "4" میچز کھیلے اور 15 وکٹیں لیں۔ مجھے سوئٹزر لینڈ کرکٹ بورڈ کی طرف سے ایوارڈ ملا کیونکہ وہاں پر نارمل پلئیر میں بھی اتنا تیز سپیڈ والا باؤلر نہیں تھا۔ پچھلے سال دسمبر2015 میں کراچی میں پاکستان ڈس ایبلڈ کرکٹ ٹرا فی منعقد ہوئی جس میں پورے ملک سے 12 ریجن کی ٹیموں نے حصہ لیا اس ٹورنا منٹ میں ہماری ٹیم نے سیمی فائنل تک رسائی حاصل کرلی تھی اور یہ سیمی فائنل " جیو سوپر" پر لائیو ٹیلی کاسٹ ہوا تھا۔ اور اس ٹورنامنٹ میں میری آل راؤنڈر پرفارمنس تھی جس کی وجہ سے میں نے سیمی فائنل تک رسائی حاصل کرلی تھی۔

شیر علی آفریدی جب دو سال کے تھے تو طوفانی ہواﺅں کی زد میں آکر اپنے گھر کے ایک کمرے کی چھت گرنے سے اس کے ملبے تلے دب گئے ۔ ان کی کزن اس قدرتی آفت کی نذر ہو گئی جبکہ کمرے کی چھت پر ڈالے گئے گارڈر تلے دبنے کے باعث دو سالہ آفریدی ہلنے جلنے کی پوزیشن میں بھی نہیں تھے۔جب مقامی لوگوں نے گارڈر کو آفریدی کی ٹانگ پر سے ہٹایا تو بہت دیر ہو چکی تھی۔ معصوم آفریدی کو اس واقعے میں دوہرے سانحے سے گزرنا پڑا۔ ایک جانب تو ان کی کزن اللہ کو پیاری ہو چکی تھی تو دوسری جانب ان کے اپنے پاﺅں کی ہڈی گھٹوں کے اوپر سے مکمل طور پر ٹوٹ چکی تھی۔اس وقت جب یہ علاقہ شمال مغربی صوبہ سرحد کے نام سے موسوم تھا تب وہاں طبی سہولیات اتنی فراوانی سے دستیاب نہیں تھیں جتنی آج ہیں۔آفریدی کو حادثہ کے کئی گھنٹے بعد اسپتال پہنچایا گیا۔ ہسپتال میں زخم کے معائنے اور ابتدائی طبی علاج کے تقریباً دو یا تین گھنٹے بعد ڈاکٹروں نے بتایا کہ پاﺅں کا زخم خراب ہو چکا ہے اور اب ان کی زندگی بچانے کے لئے ٹانگ کا ٹنا ہوگی ۔

ڈاکٹروں کی جانب سے متاثرہ فیملی کو بتادیا گیاتھا کہ ٹانگ نہ کاٹی گئی تو بچے کی زندگی کو بھی خدشات لاحق ہو جائیں گے۔شیر علی آفریدی نے ماضی میں جھانکتے ہوئے بتایا کہ جب میں تھوڑا بڑا ہوا تو والدہ نے آگاہ کیا کہ میرے ابو ٹانگ کاٹنے کے لئے تیار نہیں تھے ۔ تاہم آفریدی کے ماموں نے حالات کو بھانپتے ہوئے ان کے والد کو ڈاکٹروں کی اس وارننگ اور خدا کی رضا سے آگاہ کیا اور کسی نہ کسی طرح آپریشن کے پروفارما پران کے انگوٹھے کا نشان لگوا لیا۔آفریدی کو آپریشن تھیٹر میں لے جانے کے بعد ان کی فیملی تھیٹر کے باہر سجدوں میں پڑی ان کی زندگی کی بھیک مانگنے میں مصروف تھی ۔ ڈاکٹر آپریشن تھیٹر سے باہر آئے تو انہوں نے سپاٹ لہجے میں بتایا کہ بچے کی جان بچ گئی ہے تاہم اس کی جان بچانے کے لئے ایک ٹانگ کاٹنی ناگزیر ہو گئی تھی۔ ٹانگ کٹنے کی روح فرسا خبر سن کر خاندان کے لوگوں نے چیخ وپکار شروع کر دی مگر پھر بڑے بوڑھوں اور عمائدین کے سمجھانے کے بعد فیملی بچے کی جان بچ جانے پر خدا کا شکر ادا کرتی ہوئی گھر کو لوٹی۔