نئے سال کا تحفہ٬ راحت فتح علی خان بھارت سے ڈی پورٹ

نئے سال کی آمد کے ساتھ ہی ہندوستان کی جانب سے پاکستان کو پہلا تحفہ بھی موصول ہوگیا ہے- جی ہاں معروف پاکستانی گلوکار استاد راحت فتح علی خان کو ہندوستان میں داخلے سے روک کر انہیں ائیرپورٹ سے ہی ڈی پورٹ کردیا گیا ہے-
 

راحت فتح علی خان سالِ نو کے حوالے سے منعقد ایک تقریب میں اپنی پرفارمنس کے لیے حیدرآباد کے راجیو گاندھی انٹرنیشنل ایئرپورٹ پہنچے تھے- تاہم ائیرپورٹ حکام نے انہیں یہ کہہ کر ہندوستان میں داخل ہونے سے روک دیا کہ ان کے ویزے میں چند تکنیکی خرابیاں پائی جاتی ہیں-

راحت فتح علی خان کو ائیرپورٹ سے ہی واپس ابو ظہبی روانہ کردیا گیا- حکام کے مطابق پاکستانی شہری ہندوستان میں صرف 4 شہروں ئئی دہلی، ممبئی، کولکتہ اور چنئی کے راستے ہی داخل ہوسکتے ہیں جبکہ راحت فتح علی خان ہندوستانی شہر حیدرآباد کے ائیرپورٹ پہنچے ہیں-

حکام کا یہ بھی کہنا تھا کہ یہ اقدامات پاکستانی شہریوں کی بھارت آمد پر کڑی نظر رکھنے کے لیے کیے گئے ہیں-
 

دوسری جانب تقریب کی انتظامیہ نے راحت فتح علی خان کو ڈی پورٹ کیے جانے کی وجہ سے ان کی پرفارمنس کے اوقات میں ردو بدل کردی ہے-