زیرِ تعمیر عمارات جو تکمیل کے بعد تہلکہ مچا دیں گی

دنیا بھر میں اس وقت شاندار اور انوکھی عمارات کی تعمیرات تیزی سے جاری ہے اور یہ عمارات فن تعمیر کا ایک شاہکار بھی ہیں- ان زیرِ تعمیر عمارات میں چند ایسی عمارتیں بھی شامل ہیں جو اپنی تکمیل کے بعد نئے ریکارڈ بھی قائم کریں گی جبکہ یہ اس وقت دنیا بھر کی توجہ کا مرکز بھی بنی ہوئی ہیں- مستقبل کی چند ایسی ہی عجیب و غریب اور انوکھی زیرِ تعمیر عمارات کا احوال جانیے آج کے اس آرٹیکل میں:
 

Cobra Towers
یہ خوبصورت اور منفرد ڈیزائن کی حامل عمارت کویت میں تعمیر کی جارہی تھی- اس عمارت کی تعمیر کا آغاز سال 2008 میں کیا گیا تاہم معاشی بحران کے باعث اس پروجیکٹ فی الحال ملتوی کردیا گیا ہے- ایک سوال اس عمارت کے حوالے سے جو اکثر اٹھتا ہے وہ یہ کہ آیا اس عمارت میں لفٹ کیسے کام کرے گی؟ کیونکہ اس کا اسٹرکچر تو مرغولے کی شکل نما ہے-

Shanghai Tower
چین میں واقع 121 منزلہ اس عمارت کی تعمیر کا منصوبہ 1993 میں بنایا گیا لیکن یہ تعمیر رواں سال مکمل ہوئی ہے جبکہ اس کا فٹنگ کا کچھ کام اب بھی جاری ہے- اس عمارت کی بلندی سے لی جانے والی تصاویر کا سہرا ان دو روسی نوجوانوں کے سر ہے جو گزشتہ سال غیر قانونی طور پر اس عمارت میں داخل ہوگئے اور اس کے بلند ترین مقام تک جاپہنچے-

King Abdullah Petroleum Studies and Research Center
ممکن ہے کہ ہماری اس فہرست میں یہ سب سے کم بلند عمارت ہو لیکن یہ کسی صورت بھی دوسری عمارات کے مقابلے میں غیر متاثر کن نہیں ہے- سعودی عرب میں زیر تعمیر اس عمارت کا ڈیزائن مشہور کردار جیمز بانڈ کی انوکھی آرام گاہ سے مشابہہ ہے- اس عمارت کی سب سے خاص بات چھ کونوں کے حامل وہ کمرے ہیں جو سب آپس میں منسلک ہیں-

Lotte World Tower
اپنی تعمیر کی تکمیل کے بعد یہ عمارت جنوبی کوریا کے شہر سیول میں واقع تمام عمارات کے مقابلے میں سب سے بلند ترین عمارت ہوگی- یہ 123 منزلہ عمارت 555 میٹر بلند ہوگی جبکہ اس کی تعمیر 2016 میں مکمل ہوگی- یہ عمارت دکانوں٬ دفاتر٬ اپارٹمنٹس٬ ہوٹل کے علاوہ ایک ایسے پلیٹ فارم پر مشتمل ہوگی جہاں سے لوگ شہر بھر کا خوبصورت نظارہ کرسکیں گے-

Dawan Mountain Resort
چین میں زیرِ تعمیر اس ریزورٹ کا افتتاح سال 2016 میں متوقع ہے- اس ریزورٹ میں آئس امپیوزمنٹ کمپلیکس٬ انڈور اسکائنگ کمپلیکس٬ واٹر پارک اور ہوا میں معلق باغات موجود ہوں گے- اور یہ حقیقی معنی آرٹ کا ایک اعلیٰ نمونہ ہوں گے-

The Songjiang Hotel
دلچسپ اور انوکھے ڈیزائن کا حامل یہ ہوٹل بھی چین میں زیرِ تعمیر ہے جو کہ دو چٹانوں کے درمیان ایک جھیل پر تعمیر کیا جارہا ہے- اگر آپ اس کی بلندی سے دنیا کا نظارہ کرنا پسند نہیں کرتے تو آپ ہوٹل کی سب آخری منزل میں جا کر زیرِ آب دنیا کا نظارہ بھی کرسکتے ہیں-

Suzhou Zhongnan Center
حال ہی میں چیند اس بلند ترین سینٹر کی تعمیر کا آغاز کیا گیا ہے لیکن اس کی تکمیل کو ایک طویل وقت درکار ہے- یہ عمارت 730 میٹر بلند ہوگی اور اگر شیڈول کے مطابق سال 2020 تک یہ عمارت مکمل ہوجاتی ہے تو یہ چین کی سب سے بلند جبکہ دنیا کی تیسری بلند ترین عمارت ہوگی-

World One Tower
یہ 117 منزلہ زیرِ تعمیر عمارت ہے جو کہ تکمیل کے بعد دنیا کی سب سے بلند ترین رہائشی عمارت ہوگی اور ممبئی شہر کی سب سے بلند ترین عمارت ہونے کا اعزاز بھی حاصل کرے گی- اس عمارت میں 300 لگژری اپارٹمنٹس موجود ہوں گے- اس عمارت کو Georgio Armani نے ڈیزائن کیا ہے-