دنیا کے مشہور پاکستانی نعت خوان الحاج صدیق اسماعیل ایک
مرتبہ پھر دنیا کے 500 بااثر مسلمانوں کی 2016 کی فہرست میں شامل کر لیا
گیا ہے- گزشتہ 50 سالوں سے حمد اور نعت کے شعبے میں اپنی خدمات سرانجام
دینے والے صدیق اسماعیل کو یہ اعزاز آرٹ اینڈ کلچر کی کیٹیگری میں دیا گیا
ہے- اور یہ مسلسل دوسرا سال ہے کہ الحاج صدیق اسماعیل کو دنیا کے 500 بااثر
مسلمانوں کی فہرست میں شامل کیا گیا ہے-
|
|
یہ فہرست ہر سال دی رائل اسٹریٹجیک اسٹیڈیز سینٹر کی جانب سے جاری کی جاتی
ہے- یہ ایک آزاد ادارہ ہے جو کہ رائل آل البیت انسٹیٹیوٹ سے منسلک ہے- یہ
ادارہ اردن کے دارالحکومت امان میں واقع ہے-
الحاج صدیق اسماعیل گزشتہ 50 سالوں سے بھی زائد عرصے سے نعت خوانی رہے ہیں
اور اب تک کئی مقامی اور بین الاقوامی زبانوں میں نعت خوانی کر چکے ہیں-
صدیق اسماعیل کی عظیم خدمات کے اعتراف میں پاکستان کی جانب سے انہیں اب تک
ستارہ امتیاز اور صدارتی ایوارڈ پرائڈ آف پرفارمنس سے بھی نوازا جا چکا ہے-
|
|
500 بااثر مسلمانوں کی اس فہرست میں کئی اور مشہور پاکستانی شخصیات بھی
شامل ہیں جن میں آرمی چیف جنرل راحیل شریف٬ وزیراعظم نواز شریف٬ ڈاکٹر
عبدالقدیر خان٬ عمران خان٬ مفتی تقی عثمانی٬ تبلیغی جماعت کے سربراہ حاجی
عبدالوہاب٬ دعوتِ اسلامی کے سربراہ مولانا الیاس قادری٬ ڈاکٹر ادیب رضوی٬
سماجی کارکن عبدالستار ایدھی٬ ڈاکٹر عامر لیاقت٬ مولانا فضل الرحمان٬ میر
شکیل الرحمان٬ سلمان اقبال٬ سراج الحق٬ مولانا طارق جمیل٬ علامہ
طاہرالقادری٬ علامہ ساجد نقوی٬ مولانا سلیم احمد٬ پروفیسر عطا الرحمان٬
ڈاکٹر فرحت ہاشمی٬ ڈاکٹر خانم طیبہ٬ عابدہ پروین٬ ملالہ یوسف زئی اور عاصمہ
جہانگیر شامل ہیں-
|