ڈیلیٹ کیے گئے ایس ایم ایس واپس

کتنی دفعہ ایسا ہوتا ہے کہ آپ کے موبائل کا ان باکس بھر گیا اور آپ نے اس کو خالی کرنے کے لیے ڈیلیٹ آل کا بٹن دبا دیا۔ جب تمام پیغامات ڈیلیٹ ہوگئے تو آپ کو اچانک یاد آیا کہ اس میں کچھ اہم پیغامات بھی تھے جن کی آپ کو ضرورت تھی لیکن اب پچھتائے کیا ہوت جب چڑیا چک گئیں کھیت۔
 

جی نہیں اگر آپ اینڈروئیڈ اسمارٹ فون استعمال کرتے ہیں تو اب پچھتانے کی کوئی ضرورت نہیں ہے کیوں کہ اگر آپ نے غلطی سے کسی ایسے ایس ایم ایس کو ڈیلیٹ کر دیا ہے جس میں کوئی ضروری معلومات تھیں تو زیادہ پریشان ہونے کی ضرورت نہیں۔ آپ اینڈروئیڈ سمارٹ فونز کے ذریعے آپ اپنے ڈیلیٹ کیے ہوئے پیغاماتSMSبھی واپس حاصل کرسکتے ہیں۔

جس طرح کمپیوٹرپر آپ کی ڈیلیٹ کی ہوئی فائل ٹریش بن میں چلی جاتی ہے ، ٹھیک اسی طرح اینڈروئیڈ اسمارٹ فون پر بھی ہوتا ہے۔ ان فونز پر تمام ڈیلیٹ کیے گئے پیغامات مختصر وقت کے لیے فون میں ہی محفوظ رہتے ہیں اور آپ ان تمام پیغامات کو ڈیٹا ریکوری سافٹ وئیر استعمال کرتے ہوئے دوبارہ حاصل کرسکتے ہیں۔

ڈیٹا ریکوری سافٹ وئیرز آپ کے فون کو اسکین کر کے ڈیلیٹ کیا گیا مواد ڈھونڈ لیتے ہیں۔ اس کے لیے آپ ایس ایم ایس بیک ، اینڈروئیڈ ریکوری یا ڈیٹا ریکوری جیسی ایپس استعمال کرسکتے ہیں۔ اگر چہ ڈیلیٹ کیے گئے پیغامات بہت مختصر وقت کے لیے فون میں محفوظ رہتے ہیں ، اس لیے اس بات کی کوئی گارنٹی نہیں ہے کہ آپ کی جانب سے ’’دھتکارا گیا‘‘ پیغام تمام رنجشیں بھلا کر دوبارہ آپ کے پاس آہی جائے لیکن کوشش تو کی جاسکتی ہے نا۔