وہ پاکستانی گاؤں جہاں کوئی شخص بے روزگار نہیں

اسلام پور پاکستان کا وہ واحد گاؤں ہے جس کا کوئی شخص بھی بیروزگار نہیں ہے- یہ انوکھا گاؤں ضلع سوات میں واقع ہے- اس گاؤں کے تمام باسیوں کو آخر کیا روزگار میسر ہے جس سے وہ اپنی زندگی کی گاڑی کھینچ رہے ہیں؟ آئیے ہم بتاتے ہیں-

اسلام پور اپنی اعلیٰ کوالٹی کی چادروں اور شالوں کی وجہ سے دنیا بھر کے سرد علاقوں میں شہرت رکھتا ہے- یہ رنگ برنگی اور گرم شالیں اور چادریں بھیڑوں کی اون سے تیار کی جاتی ہیں-

اس گاؤں کی تیار کردہ مصنوعات پاکستان کے کئی شہروں کے علاوہ کئی دوسرے ممالک میں بھی فروخت کی جاتی ہیں جن میں قابلِ ذکر روس اور پورپی ممالک ہیں اور یہ مصنوعات زیادہ تر ایسے ممالک میں جاتی ہیں جہاں کا درجہ حرارت منفی میں ہوتا ہے-

اسلام پور کی آبادی تقریباً 17 ہزار افراد پر مشتمل ہے- اس آبادی کا ایک بڑا حصہ گرم چادریں اور شالیں وغیرہ تیار کرنے کا کام کرتا ہے جبکہ باقی افراد دیگر سرکاری محکموں اور زراعت کے شعبے سے منسلک ہیں-

اسلام پور میں روزانہ تقریباً 17 ہزار چادریں تیار کی جاتی ہیں اور پور گاؤں میں ان چادروں کی تیاری کے لیے 5 ہزار کھڈے موجود ہیں جہاں مزدوروں کی ایک بڑی تعداد مشینوں پر کام کرتی دیکھی جاسکتی ہے-

گاؤں کے بازار میں چادروں کی دکانیں موجود ہیں جہاں یہ چادریں اور شالیں انتہائی قرینے کے ساتھ سجائی جاتی ہیں- ایک عام چادر کی قیمت 400 سے 500 ہوتی ہے لیکن بعض کوالٹی کی چادروں کی قیمت ہزاروں میں بھی ہوتی ہے-

گاؤں کے گھروں میں موجود عورتیں بھی ان چادروں کے بعض مخصوص حصے تیار کرتی ہیں- غرض کہ یہاں کوئی شخص بھی بےروزگار نہیں رہ سکتا اگر وہ کام کرنا چاہے تو-

اسلام پور میں مخصوص سیزن میں ماہانہ تین ارب روپے کا کاروبار ہوتا ہے جو کہ ایک بڑی رقم ہے-

تاہم گاؤں میں کئی مسائل بھی موجود ہیں جن میں نکاسی آب کا مسئلہ سب سے بڑا ہے جو کہ بیماریوں کا سبب بھی بن رہا ہے- ضرورت اس بات کی ہے کہ حکومت اس گاؤں کے ہنرمند افراد کی بنیادی ضروریات کی طرف ضرور توجہ دے-

< Previous تاریخ کی امیر ترین شخصیات NEXT > پاکستان کی چند مسحور کن سرحدیں اور پاسز