سابق پاکستانی کھلاڑی آسٹریلیا میں ٹیکسی ڈرائیور

گزشتہ روز ہم نے آپ سے چند ایسے پاکستانی کرکٹرز کا ذکر کیا تھا جو مشہور ہونے سے قبل انتہائی سخت حالات سے گزرے ہیں لیکن آج ایک ایسے پاکستانی کرکٹر کا ذکر ہے جو بلندیوں کو چھونے کے باوجود بھی مناسب پذیرائی اور توجہ نہ ملنے کے باعث معاشی حالات کے ہاتھوں مجبور ہوکر ٹیکسی چلا رہے ہیں-
 

جی ہاں ہم بات کر رہے ہیں سابق پاکستانی کھلاڑی ارشد خان کی جو آجکل آسٹریلیا کے شہر سڈنی میں بطور ٹیکسی ڈرائیور اپنی خدمات سرانجام دے رہے ہیں-

اس بات کا انکشاف چند ایک بھارتی شہری نے کیا ہے جس نے حال ہی میں سڈنی کا دورہ کیا ہے-

بھارتی شہری گنیش بارلے نے گزشتہ روز سوشل میڈیا پر اپنی ایک پوسٹ میں انکشاف کیا ہے پاکستان کے سابق آف اسپنر ارشد خان اب آسٹریلیا کے شہر سڈنی میں ایک ٹیکسی ڈرائیور ہیں-

گنیش کی پوسٹ کے مطابق “ ارشد خان نے انہیں بتایا کہ وہ پاکستان سے ہیں اور کئی بار اس وقت حیدرآباد کا دورہ کر چکے ہیں جب وہ لاہور بادشاہ کے لیے کھیلتے تھے- مزید بات چیت کے بعد گنیش کو احساس ہوا کہ ان کا ٹیکسی ڈرائیور کوئی اور نہیں بلکہ پاکستانی کرکٹ ٹیم کا ایک مایہ ناز کھلاڑی ہے“-

ارشد خان 1997 سے 2001 تک مسلسل پاکستان کی کرکٹ ٹیم کے لیے کھیلتے رہے ہیں- اس کے بعد 2005 میں انہوں نے اپنے کیریر کی سب سے بہترین کارکردگی کا مظاہرہ کیا جس میں انہوں نے بھارت کے خلاف صرف 33 رنز کے عوض 4 وکٹیں حاصل کیں-