امریکہ: اور کرتا شلوار جیت گیا

جی ہاں بات یہی ہے۔ امریکہ کے شہر سینٹ لوئس میں ایک پاکستان نژاد ٹیکسی ڈرائیور راجہ نعیم نے سفید کرتا شلوار پہن کر ٹیکسی چلانے کا مقدمہ گزشتہ ماہ جیت لیا ہے۔ راجہ نعیم کا یہ سفر کیسے طے ہوا؟ آئیے بتاتے ہیں-

راجہ نعیم بیس سال قبل امریکہ آئے اور سینیٹ لوئیس کے علاقے مانچسٹر میں اپنی بیوی اور چار بچوں کے ساتھ رہائش پذیر تھے۔
 

دسمبر 2013، میں یہ قصہ شروع ہوا۔ جب سینیٹ لوئیس کی میٹرپولیٹن کیب کمیشن نے انہیں گرفتار کیا۔ ان پر الزام تھا کہ وہ ٹیکسی میں اپنا مذہبی لباس کرتا شلوار پہن کر سواریاں اٹھا رہے تھے جبکہ کمیشن کی طرف سے ٹیکسی ڈرائیورز کے لیے دوران ڈیوٹی کالی پینٹ اور سفید شرٹ پہننا قرار دیا گیا ہے۔

راجہ اویس نعیم کہتے ہیں کہ جون 2011میں انہیں وہلان سیکورٹی گارڈ نے انہیں خبردار کیا کہ وہ ٹیکسی ڈرائیورز کی مخصوص وردی کے بجائے کرتا شلوار اور ٹوپی پہن کر ٹیکسی نہ چلائیں۔ اگر دوسری بار ایسا ہوا تو ان کا لائیسنس معطل کردیا جائے گا اور انہیں گرفتار بھی کیاجاسکتا ہے۔

راجہ اویس نعیم کہتے ہیں کہ انہوں نے اکتوبر 2013 میں کمیشن کو اپنا مخصوص لباس پہننے کی منظوری اور اس کی اہمیت سے آگاہ کرنے کی کوشش کی تھی۔جون 2014 میں نعیم نے مقامی عدالت میں اس حوالے مقدمہ دائر کردیا تھا۔

عدالت نے راجہ اویس نعیم کا موقف سننے کے بعد ابتدائی طور پر انہیں کالی پینٹ اور گھٹنوں سے اوپر تک کا کرتا پہن کر ٹیکسی چلانے کی اجازت دی ۔ لیکن راجہ نعیم نے اپنی جدو جہد جاری رکھی۔ان کا موقف تھا کہ میں اس لباس میں خود کو زیادہ آرام دہ محسوس کرتا ہوں اور یہ میرے مذہب کا بھی معاملہ ہے،اور یونیفارم کی پابندی کی آڑ میں میری مذہبی آزادی کو سلب کرنے کی کوشش کی جارہی ہے۔