انکل سرگم اور ان کے ساتھی

میرے پیارے اﷲ میاں
تیرے راز بھی گہرے ہیں
اُن کے روزے سحری والے
میرے آٹھ پہرے ہیں

میرے پیارے اﷲ میاں
لیڈر کتنے نیک ہیں
ہم کو دیں وہ صبر کا پھل
خود کھاتے وہ کیک ہیں

جی یہ بظاہر طربیہ لیکن دراصل طنزیہ اور المیہ اشعار ہیں فاروق قیصر کے۔ فاروق قیصر المعروف انکل سرگل۔ انکل سرگم کا کردار تخلیق کرنے والے فاروق قیصر اک ہمہ جہت شخصیت ہیں۔ ادیب، شاعر، کالم نگار، مکالمہ نویس، آرٹسٹ، کارٹونسٹ اور پتلیاں بنانے والے فنکار انکل سرگم سے کونسا پاکستانی واقف نہیں ہے؟ انکل سرگم فاروق قیصر کا تخلیق کردہ ایک خوبصورت اور اچھوتا کردار ہے۔ والد کی سرکاری نوکری کی وجہ سے یہ پاکستان کے مختلف شہروں میں گھومتے رہے اور ان کا تعلیمی سفر بھی مختلف شہروں میں تکمیل تک پہنچا یعنی میٹرک پشاور سے ، ایف اے کوئٹہ سے اور گریجویشن نیشنل کالج آف فائن آرٹس لاہور سے کیا۔ جبکہ فائن آرٹس میں ماسٹرز انہوں نے رومانیہ سے کیا ۔جبکہ 1999میں کیلیفورنیا امریکا سے ماس کمیونی کیشن میں بھی ماسٹرز کیا ہے۔
 

فاروق قیصر نے 70 کے اوائل میں نیشنل کالج آف فائن آرٹس لاہور سے گریجویشن کے بعد فنی زندگی کا آغاز کیا۔ بقول فاروق قیصرم یں نے 1970 میں پی ٹی وی کے پروگرام ـــ ’’ اکڑ بکڑ‘‘میں ایک بطخ کا کردار ادا کیا تھا اور آج تک اسی بطخ کے انڈے کھا رہا ہوں۔ ان کے مشہور پروگراموں میں کلیاں، ڈاک ٹائم اور ایک نجی ٹی وی سے آنے ولا پروگرام سیاسی کلیاں ہیں۔ انہوں نے پتلیوں کے کردار بنا کر ان کے ذریعے معاشرتی ناہمواری اور سماجی برائیوں پر تنقید کی۔ انہوں نے اپنے Puppets کے ذریعے محض لوگوں کو خوش کرنے یا ہنسانے کے بجائے ایک ماہر سرجن کی طرح طنز و مزاح کے نشتر کے ذریعے معاشرتی اصلاح کی کوشش کی ہے۔ پتلیوں کے علاوہ ان کو کارٹون نگاری میں بھی کمال حاصل ہے۔یہاں ہم ان کے تخلیق کردہ کچھ مشہور کرداروں کا تعارف پیش کریں گے۔ البتہ ہمیں یقین ہے کہ قارئین ان کرداروں سے بخوبی واقف ہونگے۔

انکل سرگم : بڑی بڑی آنکھو ں پر ان سی بڑی نظر کی عینک ، موٹی مونچھیں ، آدھے گنجم آدھے بالم یہ ہیں انکل سرگم ۔یہ فاروق قیصر صاحب کا مشہور ومعروف کردار ہے۔ انکل سرگم ایک ایسا کردار ہے جو معاشرتی ناہمواریوں، سماجی برائیوں پر طنز و مزاح کے ذریعے گہری چوٹ کرتے ہیں ۔ ان کے ساتھی ان کے پاس مختلف مسائل لے کر آتے ہیں اور یہ ان کو ان کی پریشانیوں کے اسباب اور حل بتاتے ہیں لیکن اس انداز میں بتاتے ہیں کہ بظاہر تو لوگ سمجھتے ہیں کہ مذاق کیا جارہا ہے لیکن دراصل ان کے فقرے بڑے گہرے اور کاٹ دار ہوتے ہیں۔ یہاں آپ کو یہ بتاتے چلیں کہ یہ ان کی پہلی تخلیق بھی ہے اور ہر انسان کو اپنی پہلی تخلیق اور پہلی اولاد سے پیار ہوتا ہے۔ یہی کچھ انکل سرگم کے ساتھ ہے ۔ فاروق قیصر صاحب نے کئی کردار تخلیق کیے لیکن انکل سرگم سب سے نمایاں ہے۔ اس کردار کی تخلیق کا معاملہ بھی بہت دلچسپ ہے۔70کی دہائی کے وسط میں فاروق قیصر صاحب گرافکس آرٹس میں ماسٹر کرنے کے لیے رومانیہ گئے ہوئے تھے۔ وہاں ان کے ایک استاد پروفیسر سرگم تھے۔ایک دن فاروق قیصر نے سوچا کہ میں اپنی تعلیم کو کام میں لاتے ہوئے کوئی پتلی بناتا ہوں،اس طرح انہوں نے پہلی بار ایک کردار بنایا، جب انہوں نے وہ کردار اپنے استاد پروفیسر سرگم کو دکھا یا تو وہ حیرا ن رہ گئے کیوں کہ وہ کردار حیرت انگیز طور پر ان سے بہت زیادہ مشابہت رکھتا تھا۔ تو پھر انہوں نے اس کردار کا نام ہی انکل سرگم رکھ دیا۔ انکل سرگم فاروق قیصر صاحب کا مرکزی کردار بھی ہے۔