’بیک ٹو دی فیوچر‘، ہوا میں تیرتا تختہ اب حقیقت

ہالی وُڈ کی 1980ء کی دہائی کی سائنس فکشن فلم ’بیک ٹو دی فیوچر‘ میں ایسے اسکیٹ بورڈ دکھائے گئے تھے، جو زمین کی بجائے فضا میں اڑ سکتے ہیں۔ تاہم اب یہ محض ایک خیال نہیں رہا بلکہ اسے حقیقت کا روپ مل گیا ہے۔

ڈوئچے ویلے کے مطابق ٹویوٹا کپمنی کے لگژری کار برانڈ لیکسس کی جانب سے کہا گیا ہے کہ اس نے ایک ایسا پروٹوٹائپ بنایا ہے جو زمین سے کچھ اوپر ہوا میں بلند ہو کر سفر کر سکتا ہے۔ یہ جاپان میں تیار کی گئی ’میگلیو ٹرین‘ کی طرز کی ٹیکنالوجی پر بنایا گیا ہے۔
 

لیکسس کی طرف سے اس ’اسکیٹ بورڈ‘ کی ایک مختصر تعارفی یا ’ٹِیزر‘ ویڈیو جاری کی گئی ہے جس میں ایک ’ہوور بورڈ‘ ہوا میں معلق دکھایا گیا ہے، تاہم یہ ویڈیو اس سے قبل ہی ختم ہو جاتی ہے جب ایک شخص اس پر قدم رکھنے لگتا ہے۔

’بیک ٹو دی فیوچر‘ میں دکھائے گئے ہوور بورڈز کے ذریعے اداکار، پانی کے علاوہ کسی بھی چیز کے اوپر سفر کر سکتے تھے، تاہم لیکسس کے تیار کردہ ماڈل کو ہوا میں بلند کرنے کے لیے ضروری ہے کہ زمیں پر مقناطیس لگے ہوں۔ اس کا مطلب ہے کہ یہ ہوور بورڈ مخصوص راستوں پر ہی سفر کر سکے گا۔

لیکسس انٹرنیشنل کے ایگزیکٹیو وائس پریزیڈنٹ مارک ٹیمپلِن کے مطابق یہ پراجیکٹ ’’ایسی حیران کن چیزوں کی ایک بہترین مثال ہے، جو آپ ٹیکنالوجی، ڈیزائن اور تخیل کے ادغام سے حاصل کر سکتے ہیں۔‘‘

لیکسس کمپنی کی طرف سے بتایا گیا ہے کہ اس ہوور بورڈ کی آزمائش اسپین کے شہر بارسلونا میں آئندہ چند ہفتوں میں شروع ہو جائے گی اور موسم گرما کے اختتام تک جاری رہے گی۔ خیال رہے کہ ایک امریکی ٹیم نے بھی گزشتہ برس ایک ہوور بورڈ متعارف کرایا تھا جس کے بارے میں اس کا کہنا تھا کہ یہ باقاعدہ کام کرتا ہے۔