ہیپاٹائٹس کیا ہے؟ اس کی علامات اور علاج٬ ڈاکٹر شاہین

دورِ حاضر میں ہیپاٹائٹس کا مرض بہت عام ہوتا چلا جا رہا ہے، جس کی اہم وجہ بیشتر لوگوں میں اس مرض کے بارے میں لاعلمی ہے یا پھر جو لوگ اس مرض سے تھوڑا بہت واقف بھی ہیں ان کا اس بیماری کو معمولی سمجھ کر اس کے علاج پر توجہ نہ دینا ہے- یہ ایک حقیقت ہے کہ ہیپاٹائٹس ایک خطرناک بیماری ہے اور اس مرض پر قابو پانے کے لئے لوگوں کو اس کے حوالے سے ضرور آگہی ہونی چاہئے- اسی سلسلے میں ہماری ویب کی ٹیم نے معروف ہربلسٹ ڈاکٹر شاہین سے اس مرض کے حوالے سے بہت سی اہم اور مفید معلومات حاصل کیں تاکہ لوگوں کو ہیپاٹائٹس کے بارے میں شعور اور آگہی فراہم کی جاسکے-

ڈاکٹر شاہین کہتی ہیں کہ “ جگر کی جو سب سے بڑی بیماری ہمارے ہاں عام ہے وہ ہیپاٹائٹس ہے- یہ ایک ایسی قدیم بیماری ہے جسے آج بھی حالیہ بیماری ہی قرار دیا جاتا ہے-
 

“ ہیپاٹائٹس کی بیماری خراب غذا کی وجہ سے جگر پر حملہ آور ہوتی ہے- غذا کو اگر متوازن نہ کھایا جائے اور بےوقت کھایا جائے تو اسے ہضم ہونے میں مشکل پیش آتی ہے جس کا براہ راست اثر جگر پر پڑتا ہے“-

ڈاکٹر شاہین کے مطابق “ جگر ہمارے جسم کا ایسا عضو ہے جو خون بناتا ہے اور غذا کو جذب کر کے جسم کے اس عضو تک پہنچاتا ہے جس کی اسے ضرورت ہوتی ہے“-

“ لیکن ہم جو غذائیں استعمال کر رہے ہیں ان کا فائدہ نہیں بلکہ صرف نقصان ہے- سبزیوں کا استعمال کم ہوتا جارہا ہے اور چکن کی غذائیں بڑھتی جارہی ہیں جبکہ سبزیاں ہمیشہ ہی بہترین رہی ہیں“-

“ ضروری ہے کہ ہم خود بھی سبزیاں کھائیں اور اپنے بچوں کو بھی ان کی عادت ڈالیں“-

ڈاکٹر شاہین کا کہنا تھا کہ “ ہیپاٹائٹس میں یہ نہیں معلوم چلتا کہ انسان کا جگر بیمار پڑچکا ہے کیونکہ اس بیماری کی آغاز میں کوئی علامت ظاہر نہیں ہوتی سوائے اس کے کہ انسان کو بھوک نہیں لگتی“-

“اکثر لوگ یہ سمجھتے ہیں کہ شاید مریض کو کھانا پسند نہیں آیا جبکہ یہ نہیں دیکھتے کہ اس کا جسم یہ غذا قبول کر بھی رہا ہے یا نہیں؟ اس کے بعد معدے کے امراض پیدا ہونا شروع ہوجاتے ہیں اور لوگ جگر کی جانب توجہ ہی نہیں دیتے“-

“ آغاز میں آہستہ آہستہ جگر کے ٹشو خراب ہونا شروع ہوتے ہیں اور انسان کو پہلے ہیپاٹائٹس اے ہوتا ہے اور بعد میں یہ ہیپاٹائٹس بی میں داخل ہوجاتا ہے- تب کچھ اثرات نمایاں ہونا شروع ہوجاتے ہیں“ -