لاکھوں دلوں کو ہلا کر رکھ دینے والی تصاویر

چند روز قبل ایک شامی بچی کی تصویر دنیا بھر میں لاکھوں افراد کے دلوں کو جنجھوڑ کے رکھ دیا تھا- مذکورہ تصویر میں بچی نے کیمرے کو گن سمجھ کر ہاتھ اوپر اٹھا رکھے تھے-

لیکن اب ایک اور بچی کی ایسی ہی ایک تصویر منظرِ عام پر آئی ہے جس میں بچی نے امدادی ورکر کے کیمرے کو ہتھیار سمجھ کر روتے ہوئے خوف سے اپنے ہاتھوں کو اوپر اٹھا رکھا ہے-
 

اس معصوم بچی کا تعلق بھی شام سے ہے اور یہ اردن کے ایک پناہ گزین کیمپ میں مقیم ہے-

ریڈ کراس سوسائٹی کے ورکر رینی شکلتوف نے یہ تصویر نومبر میں لی لیکن اس وقت انہیں بچی کے دہشت زدہ ہونے کا احساس نہیں ہوا تھا کہ یہ بچی کیمرے کو ہتھیار سمجھ کر اتنی خوفزدہ ہوگئی تھی اس نے خود کو سرنڈر کرنے کے لیے اپنے ہاتھ اوپر کرلیے۔

رینی کے مطابق جب انہوں نے کمپیوٹر پر اس بچی کی تصویر کو ایڈٹ کر کے دیکھا تو ان کی آنکھوں میں آنسو آگئے اور وہ دکھ کی کیفیت میں مبتلا ہوگئے- تصویر میں معصوم بچی کے چہرے پر موجود خوف اور آنسوؤں سے شامی بچوں کی مشکلات کا اندازہ لگایا جاسکتا ہے-

رینی کو اس بچی کا نام تو نہیں معلوم لیکن بس اتنا جانتے ہیں کہ یہ بچی اردن کے دارالحکومت عمان سے 62 میل مشرق میں واقع ازراق نامی پناہ گزین کیمپ میں مقیم ہے-