دل٬ قدرت کا عظیم معجزہ اور حیران کن حقائق

یہ تو ہم سب کو معلوم ہے کہ دل ایک انتہائی اہم عضو ہے جس کے بغیر انسان زندہ نہیں رہ سکتا۔ لیکن آپ کو یہ بھی معلوم ہونا چاہیے کہ دل کا معاملہ سادہ نہیں ہے اور ماہرین اسے قدرت کا ایک عظیم معجزہ قرار دیتے ہیں- آج ہم اس عظیم معجزے سے جڑے چند ایسے حیران کن حقائق پر نظر ڈالیں گے جو ڈوئچے ویلے کی رپورٹ سے لیے گئے ہیں-
 

حیران کُن سکشن اور پریشر پمپ
ایک بند مُٹھی کی شکل اور حجم رکھنے والا قدرت کا یہ حیران کن معجزہ روزانہ قریب 10 ہزار لیٹر خون ہمارے جسم میں پمپ کرتا ہے۔ اور یہ عمل زندگی کے آخری لمحے تک بغیر رُکے جاری رہتا ہے۔ جاگنگ وغیرہ کے دوران خون کی پمپ کی جانے والی مقدار پانچ گنا تک بڑھ جاتی ہے۔

مکمل طور پر عضلات کا کام
دل محض مسلز یا عضلات سے مل کر بنا ہے تاہم یہ بہت ہی خاص ہے۔ یہ ٹانگوں اور بازوؤں کے عضلات سے ملتا جلتا ہے کیونکہ یہ بہت طاقت کے ساتھ سکڑتا اور پھیلتا ہے۔ مگر خاص بات یہ ہے کہ یہ دیگر عضلات کی طرح کبھی تھکتا نہیں۔

اوپن ہارٹ سرجری
دل کے آپریشن کے لیے ڈاکٹروں کو دل کی دھڑکن کچھ وقت کے لیے روکنا پڑتی ہے۔ اس مقصد کے لیے ڈاکٹروں نے 50 کی دہائی میں ایک ہارٹ-لنگ مشین یعنی مصنوعی دل اور پھیپھڑوں جیسی مشین تیار کی تھی۔ جس دوران دل کا آپریشن مکمل کیا جاتا ہے یہ مشین مریض کو زندہ رکھتی ہے۔

رگوں کے ذریعے دل تک
دل کے آپریشن کے لیے اب ڈٓاکٹروں کو مریض کا سینہ کاٹنے کی ضرورت نہیں رہی بلکہ اب یہ عمل ایک خاص مشین کے ذریعے تکمیل پاتا ہے۔ اس میں ایک ڈاکٹر ایک خصوصی لچکدار آلے کو مریض کے بازو میں موجود رگ کے ذریعے دل تک پہنچاتا ہے اور دل میں موجود مسئلے کو دور کرتا ہے۔ اس دوران مریض کو محض لوکل انستھییزیا دیا جاتا ہے۔

تہہ ہونے والا دل کا والو
اگر دل کا کوئی ایک والو خراب ہو جائے تو اسے ٹھیک کرنے کی ضرورت ہوتی ہے۔ اس کے لیے یا تو کسی مخصوص جانور یا دھاتی والوو کا استعمال کیا جاتا ہے۔ تاہم اب ایسے بھی مصنوعی والوو تیار کر لیے گئے ہیں جو تہہ ہو سکتے ہیں۔ اس طرح ایک باریک سوراخ کے ذریعے سرجن اسے دل میں نصب کر دیتا ہے اور اوپن ہارٹ سرجری کی ضرورت نہیں پڑتی۔

رگوں میں رکاوٹ
کورونری آرٹریز یا شریانیں ہمارے جسم کے خلیوں تک خون کے ذریعے خوراک اور آکسیجن پہنچاتی ہیں۔ ایسی کسی شریان میں رکاوٹ نہ صرف ہمارے جسم کے عضلات کے لیے نقصان دہ ہوتی ہے بلکہ ہارٹ اٹیک کا سبب بھی بن سکتی ہے۔ ایسی صورت میں سرجن بائی پاس آپریشن کے ذریعے متاثرہ رگ کے رکاوٹ والے حصے کو نکال دیتا ہے۔

زندگی بچانے والی دھات
اگر شریانوں کا اندورنی حصہ سکڑ جائے تو ڈاکٹر ایک نالی کے ذریعے شریان میں ایک ٹیوب سی داخل کر دیتے ہیں۔ اس طرح یہ شریان دوبارہ نہیں سکڑتی۔ یہ دھات کی بنی ٹیوبس ہوتی ہیں جو شریان کو اندر سے سپورٹ فراہم کرتی ہیں۔