عام اشیا جو آپ کی جان لے سکتی ہیں

عام طور پر شارک مچھلی کو انسان کے لیے خوفناک تصور کیا جاتے ہے جس کی وجہ سے ہر سال متعدد افراد موت کا شکار ہوجاتے ہیں- لیکن آپ کو یہ جان کر حیرت ہوگی کہ زیادہ تر اموات کا سبب وہ عام چیزیں ہوتی ہیں جو ہم اپنی روزمرہ زندگی میں استعمال کرتے ہیں- ان اشیاﺀ کے باعث واقع ہونے والی اموات کی تعداد شارک حملوں میں ہلاک ہونے والے افراد کی تعداد سے بھی کئی زیادہ ہے-

بظاہر عام طور پر صرف شارک کو ایک خوفناک مخلوق سمجھا جاتا ہے لیکن اس سے زیادہ جان لیوا انسان کے لیے ٹی وی ثابت ہوتا ہے- ہر سال تقریباً 29 افراد صرف اپنے اوپر ٹی وی سیٹ کے گرنے کی وجہ سے موت کا شکار ہوجاتے ہیں-

دورانِ ڈرائیونگ موبائل فون کا استعمال انتہائی خطرناک ثابت ہوتا ہے- صرف امریکہ میں ہی ہر سال تقریباً 6 ہزار افراد اپنی اس بری عادت کے باعث موت کا شکار بن جاتے ہیں-

بہت سی ایسی چیزیں ہیں جو باتھ ٹب میں نہیں کرنی چاہئیں- مثال کے طور پر سونا٬ ہر سال تقریباً 300 اموات باتھ ٹب میں ڈوبنے کی وجہ سے ہوتی ہیں جن میں سے بیشتر اموات کا سبب نیند ہوتی ہے-

پینسل کا استعمال لکھنے کے لیے کیا جاتا ہے لیکن کیا آپ یقین کریں گے کہ ہر سال تقریباً 100 افراد اسی پینسل کے باعث موت کا شکار بن جاتے ہیں-

وینڈنگ مشین کے گرنے کی وجہ سے موت کا شکار ہونے والے افراد کی تعداد شارک اور سانپ کی وجہ سے ہلاک ہونے والوں کی مجموعی تعداد سے بھی زیادہ ہے- صرف امریکہ میں ہر سال 2 افراد وینڈنگ مشین کے گرنے کی وجہ سے ہلاک ہوجاتے ہیں-

ہر سال 40 سے 60 افراد آسمانی بجلی کے گرنے کی وجہ سے اپنی جان سے ہاتھ دھو بیٹھتے ہیں- اور یہ تعداد بھی شارک کے حملوں میں ہلاک ہونے والے افراد کی تعداد سے زیادہ ہے-

صرف شمالی امریکہ میں ہی ہر سال موم بتی کی وجہ سے 10 ہزار مقامات پر آگ لگنے کے واقعات پیش آتے ہیں اور 120 افراد موت کا شکار بن جاتے ہیں- اس لیے موم بتی کا استعمال انتہائی احتیاط کے ساتھ کیجیے-

ہر سال صرف امریکہ میں 1600 افراد سیڑھیوں سے متعلق پیش آنے والے حادثات میں اپنی جان سے ہاتھ دھو بیٹھتے ہیں- سیڑھیاں اترتے اور چڑھتے وقت احتیاط سے کام لیجیے اور ممکن ہو تو حفاظتی جنگلے پر اپنی گرفت مضبوط رکھیے-

اگر آپ کو کہیں جیلی فش دکھائی دے تو ہرگز اسے ہاتھ نہ لگائیے کیونکہ ان کا کاٹنا انتہائی مہلک ثابت ہوتا ہے- دنیا بھر میں ہر سال تقریباً 200 افراد صرف جیلی فش کے کاٹنے کے باعث اپنی جان سے ہاتھ دھو بیٹھتے ہیں-

بیڈ کا استعمال آرام و سکون کے لیے کیا جاتا ہے لیکن کبھی کبھی انسان اس کی وجہ سے ہمیشہ کی نیند بھی سو جاتا ہے- ہر سال تقریباً 450 افراد بیڈ سے گرنے کی وجہ سے ہلاک ہوجاتے ہیں-

ہر سال درجنوں افراد آتش بازی کی وجہ سے اپنی جان سے ہاتھ دھو بیٹھتے ہیں- اس لیے آتش بازی کے سامان سے بھی دو رہنا بہتر ہے-

فرنیچر کو ایک مقام سے دوسرے مقام پر شفٹ کرنا ایک عام سی بات ہے لیکن بھاری فرنیچر کو منتقل کرنا کبھی کبھی جان لیوا بھی ثابت ہوجاتا ہے- ہر سال 26 افراد بھاری فرنیچر کی وجہ سے موت کا شکار بن جاتے ہیں-