سعودی نوجوان قبر کھود کر لیٹ گیا اور موت---

یہ حقیقت ہے کہ کبھی کبھی انسان کے ساتھ اچانک ایسے حالات پیش آجاتے ہیں کہ اسے ان حالات سے نجات کا واحد حل اپنی موت میں ہی نظر آتا ہے لیکن اس نوجوان کے ساتھ ایسا کیا ہوا جو اپنی قبر خود کھود کر لیٹ گیا اور موت کا انتظار کرنے لگا-
 

درحقیقت یہ سعودی نوجوان اپنے خاندان کے ہمراہ صحرا میں پکنک منانے گیا تھا لیکن بدقسمتی سے بچھڑ گیا جبکہ اس کا سیل فون بھی اس کے خاندان کے پاس تھا- اور ساتھ ہی یہ نوجوان صحرا میں راستہ بھی بھٹک گیا جس کے بعد اسے اپنی موت یقینی لگنے لگی-

سعودی اخبار کے مطابق احمد صالح الغامدی نامی نوجوان سعودی عرب کے العقیق کا رہائشی ہے اور یہ اپنی فیملی کے ساتھ صحرا میں پکنک منانے گیا تھا- لیکن بدقسمتی سے گاڑی خراب ہونے کے باعث یہ نوجوان اپنے گھر والوں سے بچھڑ گیا۔

اس سعودی نوجوان نے پیدل چلنا شروع کردیا لیکن غلط سمت میں جانے کی وجہ سے راستہ بھٹک گیا اور تین روز صحرا میں راستہ تلاش کرتا رہا جبکہ اس دوران یہ بھوکا پیاسا رہا کیونکہ اس کے پاس کھانے پینے کا کوئی سامان موجود نہ تھا-

جب یہ راستہ تلاش کرنے میں ناکام رہا تو مایوس ہوکر اس وہی ایک گڑھا کھودا اور اس میں لیٹ گیا-

احمد صالح الغامدی کا کہنا ہے کہ “ میں نے یہ سوچ کر گڑھا کھودا تھا کہ میں اس میں لیٹ کر خود کو ٹھنڈ اور جنگلی جانوروں سے محفوظ رکھ سکوں گا اور اگر اسی حالت میں میری موت واقع ہوگی تو یہی گڑھا میری قبر بھی بن جائے گا“-