|
دنیا کی مقبول ترین ٹی وی سیریز ’اسٹار ٹریک‘ کے ہیرو
اداکار لیونارڈ نموئے انتقال کر گئے۔ اس شہرہ آفاق سیریز میں نموئے نے
کیپٹن اسپوک کا لافانی کردار ادا کیا تھا جو مدتوں بعد بھی لوگوں کے ذہنوں
میں زندہ ہے۔
|
|
|
|
نموئے کی عمر 83 برس تھی اور وہ ایک طویل مدت سے مرض میں مبتلا تھے اور ان
کا انتقال لاس اینجلس میں واقع ان کی رہائش گاہ پر ہوا۔
ٹی وی سیریز ’اسٹار ٹریک‘؛ میں ہی کیپٹن کرک کا کردار ادا کرنے والے فنکار
ولیم شٹنر نے فیس بک پر اپنے تاثرات کا اظہار ان الفاظ میں کیا ہے: ’ہم
انہیں ہمیشہ یاد رکھیں گے۔ ان کا ذوق، حس مزاح، ان میں موجود بے پناہ
صلاحیتیں اور کبھی ختم نہ ہونے والی محبت بھلائی نہیں جاسکتی۔‘
ایک اور ساتھی فنکار جارج تکی جنہوں نے سولو کا کردار ادا کیا تھا، کا کہنا
ہے کہ، ’دنیا نے آج ایک عظیم انسان اور ایک عظیم دوست کو کھو دیا ہے۔ میرے
پاس انہیں یاد رکھنے کے بہت سے بہانے ہیں۔‘
|
|
|
نموئے نے پچھلے سال ایک بیان میں کہا تھا کہ وہ ایک دیرینہ مرض سے زندگی کی
جنگ لڑ رہے ہیں۔ انہوں نے اپنی سانس کی بیماری کو سگریٹ کی دین بتایا تھا،
حالانکہ وہ کافی عرصہ پہلے سگریٹ نوشی ترک کرچکے تھے۔ تاہم، پچھلے ہی ہفتے
انہوں نے اپنے مخصوص مزاحیہ انداز میں ’ٹوئٹ‘ کیا تھا کہ ’میں نے 30 سال
پہلے سگریٹ نوشی ترک کردی تھی۔‘ |