دنیا کی نظروں سے اوجھل انوکھا آباد جزیرہ٬ لیکن ایسا کیوں؟

ماضی میں کئی ایسے شہر موجود تھے جن کا آج دنیا میں کوئی وجود نہیں اور ان کے بارے میں ہمیں معلومات صرف کتابوں کے ذریعے ہی ملتی ہے- لیکن دنیا میں ایک قصبہ ایسا بھی موجود ہے جو اپنا وجود رکھنے کے باوجود ایک مدت تک دنیا کی نظروں سے اوجھل رہا-

یہ قدیم ترین قصبہ ایک طویل عرصے تک پوشیدہ رہنے کے بعد دنیا کے سامنے اس وقت آیا جب سیاحوں نے اسے دوبارہ دریافت کرلیا- اور آج اس قصبے کو Monemvasia کے نام سے جانا جاتا ہے جو کہ بنیادی طور پر ایک جزیرہ ہے-
 

Monemvasia بھی جبرالٹر کی مانند ایک چٹانی جزیرہ ہے اور یونان کے مشرقی ساحلی علاقے Peloponnese میں واقع ہے- اور یہ جزیرہ ایک مختصر سڑک کے ذریعے مرکزی زمین سے منسلک ہے-

اس جزیرے کے چوڑائی 300 میٹر جبکہ لمبائی صرف ایک کلومیٹر ہے- سطح مرتفع پر واقع یہ جزیرہ سطح سمندر سے سینکڑوں میٹر کی بلندی پر ہے-

سطح مرتفع کی ڈھلوان پر واقع ہونے ساتھ ساتھ اس جزیرے کا رخ سمندر کی دوسری جانب ہونے کی وجہ سے جزیرے پر موجود آبادی کا مرکزی زمین سے نظر آنا تقریباً ناممکن ہوتا ہے- اور آبادی کی وجہ سے اسے ایک چھوٹا سا قصبہ بھی قرار دیا جاسکتا ہے-

اس قصبے کی قابلِ ذکر رومانوی دیواریں بازنطینی اور عثمانیہ سطلنت کے دور کی ایک جیتے جاگتے میوزیم کی حیثیت رکھتی ہیں جس کی تاریخ 13ویں صدی سے جاملتی ہے-