کراچی: ساتویں عالمی اردو کانفرنس کا آغاز اور نامور شخصیات

کراچی میں 16 اکتوبر 2014 سے آرٹس کونسل آف پاکستان کے زیر اہتمام ساتویں عالمی اردو کانفرنس شروع ہوگئی ہے جو کہ چار روز تک جاری رہے گی۔ جمعرات سے شروع ہونے والی چار روزہ کانفرنس میں50 سے زائد ممالک سے نامور ادیب ،شاعر،نقاد اور دانشور شرکت کریں گے۔جن میں لندن سے رضا علی عابدی،غزل انصاری ،نجمہ عثمان،ایران سے افتخار عارف اور بھارت سے قاضی افضال حسین ، عبید صدیقی،انیس اشفاق،رنجیت سنگھ چوہان، ابھیشیک شُکلا،خوشبیر سنگھ شاد،امیر امام اور امریکا سے عشرت آفریں سمیت دیگر ممالک کے ادیب شامل ہیں ۔

ساتویں عالمی اردو کانفرنس کے موقع پر آرٹس کونسل کی عمارت کو برقی قمقموں سے سجایا گیا ۔ اس موقع پرآرٹس کونسل کے عہدیداران نے خصوصی طور پر لباس تیار کرایا ۔
 

ملک کے معروف دانشور، محقق اور افسانہ نگار انتظار حسین کا کراچی آرٹس کونسل میں منعقد ہ ساتویں عالمی اردو کانفرنس کے افتتاحی اجلاس سے خطاب کرتے ہوئے کہنا تھا کہ قیامتیں تو اب دنیا اسلام میں ٹوٹی ہوئی ہیں ۔مسلمانوں کو اس کی عادت ہونی چاہئے ۔اور ہمیں ثقافت کو پروان چڑھانے کا سفر جاری رکھنا چاہئے ۔انہوں نے کہا کہ ادب کے میدا ن میں آنے والوں کو ایک ہزار راتوں کے اندھیروں کو برداشت کرنے کا حوصلہ ہونا چاہئے۔ اس موقع پر مجلس صدارت میں عبداللہ حسین ،مسعود اشعر،ضیامحی الدین،ڈاکٹر افضال حسین ،افتخار عارف،پروفیسر سحر انصاری ،ڈاکٹر پیر زادہ قاسم ،مستنصر حسین تارڑ،عطاالحق قاسمی،خلیل طوقار، رضا علی عابدی اور صدر آرٹس کونسل پروفیسر اعجاز احمد فاروقی بھی موجود تھے۔

صدر مجلس نے مزید کہا کہ کراچی کا سات سال پہلے بھی یہی نقشہ تھا جو آج ہے ۔جب پہلی اردو کانفرنس کا انعقاد ہوا تو کوئی سوچ نہیں سکتا تھا کہ یہ کانفرنس تواتر کے ساتھ منعقد ہوتی رہیں گی ۔ کراچی بلاشبہ دمشق سے آگے بڑھ گیا ہے ۔کراچی والوں نے کمال کر دکھایا ہے ۔لاہور والوں نے یہاں کی دیکھا دیکھی کانفرنس شروع کی اور اب کراچی ،لاہور کے بعد اسلام آباد میں بھی اردو کانفرنس منعقد ہورہی ہے ۔انہوں نے کہا ایک طرف قیامت مچی ہوئی ہے تو دوسری طرف ادب کی کانفرنسیں جاری ہیں ۔جو لوگ موت سے بھاگتے ہیں وہ دراصل موت کی طرف بھاگتے ہیں۔

افتتاحی اجلاس میں کلیدی خطبہ پیش کرتے ہوئے بھارت سے آئے ہو ئے مندوب ڈاکٹر قاضی افضال حسین نے کہا کہ زبان انسان کے خلق کی ضرورت ہے ۔زبان سے زبان کا دو سطح پر تعلق ہوتا ہے ۔ایک خلقی اور دوسرا معاشی طور پر ۔برصغیر میں اردو زبان کل بھی موجود تھی اور ترسیلی صلاحیت ہونے کی بنا پر یہ زبان آج بھی اپنی پوری توانائی کے ساتھ موجود ہے ۔اس زبان نے ثابت کردیا ہے کہ یہ دنیا بھر میں ترسیلی طور پر رابطے کی زبان ہے ۔

سابق شیخ الجامہ کراچی ڈاکٹر پیر زادہ قاسم نے کہا کہ ہمارا آج ہمیشہ بدل جانے والی چیز ہے ۔ اس بات کو ذہن میں رکھتے ہوئے ہمیں بدلتے ہوئے منظر میں اپنا عکس دیکھنا ہوگا ۔اردو زبان ادب اور ثقافت کا سب سے بڑا پرچار بن چکی ہے ۔کسی بھی روایت کو قائم رکھنا بڑی بات ہوتی ہے ۔مگر اسے مستقل رکھنا کہیں زیادہ مشکل ہوتا ہے ۔اردو ادب کی یہ سب سے بڑی کانفرنس ہے ۔زبان ادب ثقافت کو موجودہ صورتحال میں دیکھنا چاہئے معاشرہ بدلتا رہتا ہے ۔معاشر ے کی نفسیات میں بڑی تبدیلیا ں آچکی ہیں ہمارے معاشرے نے اپنی ترجیحات بدل لی ہیں ۔زبان ،ادب ،ثقافت اب ہماری ترجیحات میں شامل نہیں رہے ۔ہم غیر محسوس طور پر عالم گیر کلچر کی طرف مائل ہوتے جارہے ہیں ۔تاریخ ہمیں بتاتی ہے کہ اقلیت میں رہنے والی ثقافت کبھی پروان نہیں چڑھتی ۔ہمیں اپنی زبان ،ثقافت اور ادب کی مثبت باتوں پر گہر ی نظر رکھنی چاہئیے۔